ജാമുയി ; മുൻ കാമുകിയെ സ്വകാര്യചിത്രങ്ങൾ കാട്ടി ബ്ലാക്മെയിൽ ചെയ്യാൻ ശ്രമിച്ച യുവാവും, സുഹൃത്തും പിടിയിൽ . ബിഹാറിലെ ജാമുയി ജില്ലയിലാണ് സംഭവം. യുവതിയുടെ കാമുകനായിരുന്ന മുഹമ്മദ് സർഫറാസ്, സുഹൃത്ത് ഇംതിയാസ് എന്നിവരാണ് അറസ്റ്റിലായത് . സ്വകാര്യ ചിത്രങ്ങൾ സോഷ്യൽ മീഡിയയിൽ പോസ്റ്റ് ചെയ്യാതിരിക്കാൻ 30 ലക്ഷം രൂപയാണ് ഇവർ യുവതിയോട് ആവശ്യപ്പെട്ടത്. ഒപ്പം യുവതി തന്നോടൊപ്പം ഒരു ദിവസം കഴിയണമെന്നും സർഫറാസ് ആവശ്യപ്പെട്ടു.
ബുധനാഴ്ചയാണ് ജില്ലയിലെ സൈബർ പോലീസ് സ്റ്റേഷനിൽ യുവതി ഇത് സംബന്ധിച്ച പരാതി നൽകിയത് . സ്വകാര്യ ചിത്രങ്ങളും വീഡിയോകളും വൈറലാക്കുമെന്നായിരുന്നു മുൻ കാമുകന്റെ ഭീഷണി . പെൻഡ്രൈവിലെ വാട്ട്സ്ആപ്പ് ചാറ്റുകളുടെ ചില സ്ക്രീൻഷോട്ടുകൾ തെളിവായി പോലീസിന് കൈമാറി.
പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചപ്പോൾ മുഹമ്മദ് ഇംതിയാസാണ് ഭീഷണിയ്ക്ക് പിന്നിലെന്ന് വ്യക്തമായി. ഇംതിയാസിനെ കസ്റ്റഡിയിലെടുത്തപ്പോഴാണ് സർഫറാസിന്റെ പങ്ക് വ്യക്തമായത് .
മുഹമ്മദ് സർഫറാസും യുവതിയും തമ്മിൽ കുറച്ചുകാലം മുമ്പ് പ്രണയമുണ്ടായിരുന്നു. ഈ സമയം സർഫറാസ് യുവതിയുടെ സ്വകാര്യ ഫോട്ടോകൾ എടുക്കുകയും വീഡിയോകൾ ചെയ്യുകയും ചെയ്തിരുന്നു. പിന്നീട് ഇരുവരും വേർപിരിഞ്ഞു. ഇതിന് ശേഷമാണ് ഇംതിയാസുമായി ചേർന്ന് മുഹമ്മദ് സർഫറാസ് യുവതിയെ ഭീഷണിപ്പെടുത്താൻ തുടങ്ങിയത് .
