തിരുവനന്തപുരം: പി വി അന്വര് എംഎല്എയുമായി നടത്തിയ ഫോണ് സംഭാഷണം പുറത്തു വന്നതിന് പിന്നാലെ പത്തനംതിട്ട എസ്പി സുജിത് അവധിയില് പ്രവേശിച്ചു. മൂന്ന് ദിവസത്തേക്കാണ് അവധി. എഡിജിപി എം ആര് അജിത് കുമാറിനെതിരെ എസ്പി ഗുരുതര ആരോപണങ്ങള് ഉന്നയിക്കുന്ന ശബ്ദരേഖയാണ് പുറത്ത് വന്നത്.
മുഖ്യമന്ത്രിയുടെ പൊളിറ്റിക്കല് സെക്രട്ടറി പി ശശിയുടെ കാര്യങ്ങളെല്ലാം നടത്തിക്കൊടുക്കുന്ന എഡിജിപി അജിത് കുമാര് പൊലീസില് സര്വശക്തനാണ് എന്ന് സുജിത് ദാസ് ഫോണ് സംഭാഷണത്തില് പറയുന്നു. എല്ലാ ബിസിനസുകാരും അജിത്കുമാറിന്റെ സുഹൃത്തുക്കളാണെന്ന് അന്വര് പറയുമ്പോള് സുജിത് ദാസ് അത് ശരിവയ്ക്കുന്നുമുണ്ട്.
അതിനിടെ പി വി അന്വര് എംഎല്എ നടത്തിയ അഴിമതി ആരോപണത്തില് പൊലീസ് ഉദ്യോഗസ്ഥര്ക്കെതിരെ വകുപ്പുതല അന്വേഷണവും നടപടിയും ഉണ്ടായേക്കും എന്നാണ് സൂചന. എഡിജിപിഎം ആര് അജിത് കുമാര്, പത്തനംതിട്ട എസ്.പി സുജിത്ത് ദാസ് എന്നിവര്ക്കെതിരെ പി വി അന്വര് ഉന്നയിച്ചത് വലിയ തോതിലുളള സാമ്പത്തിക ആരോപണമാണ് . ഫോണ്സംഭാഷണത്തിന്റെ ശബ്ദ സന്ദേശം പുറത്ത് വന്നതിന് പിന്നാലെ എഡിജിപിക്കും സുജിത്തിനുമെതിരെ ഡിജിപിക്ക് പരാതികള് ലഭിച്ചിട്ടുണ്ട്.
ഉന്നത പൊലീസ് ഉദ്യോഗസ്ഥര്ക്കെതിരെ ഭരണ പക്ഷ എംഎല്എ പി വി അന്വര് ഉന്നയിച്ച പരസ്യമായ അഴിമതി ആരോപണം സര്ക്കാരിനെ പ്രതിസന്ധിയിലാക്കിയിട്ടുണ്ട്. സിപിഎം ജില്ലാ നേതൃത്വം പി വി അന്വറിനെ വിളിച്ചുവരുത്തി സംസാരിച്ചിരുന്നു. എഡിജിപി എം ആര് അജിത്ത് കുമാറിനെതിരെ രണ്ട് കോടിയുടെ അഴിമതിയും സുജിത്ത് ദാസിനെതിരെ പൊലീസ് ക്യാമ്പ് ഓഫീസിലെ മരം മുറിച്ചുകടത്തിയെന്ന ആരോപണവുമാണ് പി വി അന്വര് ഉന്നയിച്ചത്.
