കൊല്ലം : ഓയൂരില്‍ ആറു വയസുകാരിയെ തട്ടിക്കൊണ്ടുപോയ സംഭവത്തിലെ മൂന്നാം പ്രതി അനുപമയ്ക്ക് ജാമ്യം. കര്‍ശന വ്യവസ്ഥകളോടെയാണ് ഹൈക്കോടതി ജാമ്യം അനുവദിച്ചത്.
യുവതിയുടെ പ്രായം പരിഗണിച്ചാണ് ജാമ്യം അനുവദിച്ചിരിക്കുന്നത്. ബാംഗ്ലൂരില്‍ എല്‍എല്‍ബിയ്‌ക്ക് പഠിക്കണം എന്ന ആവശ്യം അനുപമ കോടതിക്ക് മുമ്പാകെ വച്ചു.
കൊല്ലം ജില്ലയില്‍ പ്രവേശിക്കരുത്, സാക്ഷികളെ സ്വാധീനിക്കരുത്, രണ്ടാഴ്ച കൂടുമ്പോള്‍ അന്വേഷണ ഉദ്യോഗസ്ഥന് മുന്നില്‍ ഹാജരാകണം എന്നിങ്ങനെ വ്യവസ്ഥകളോടെയാണ് ജാമ്യം. അനുപമയുടെ പിതാവ് പത്മകുമാറാണ് കേസിലെ ഒന്നാം പ്രതി. മാതാവ് എം.ആര്‍.അനിതാകുമാരിയാണ് രണ്ടാം പ്രതി. കുട്ടിയെ ഒളിപ്പിക്കുന്നതിലുള്‍പ്പെടെ അനുപമയ്ക്ക് പങ്കുണ്ടായിരുന്നുവെന്നാണ് പൊലീസിന്റെ കണ്ടെത്തല്‍.
കഴിഞ്ഞവര്‍ഷം നവംബറിലായിരുന്നു കേസിനാധാരമായ സംഭവവം. കഴിഞ്ഞ നവംബര്‍ അവസാനമാണ് പെണ്‍കുട്ടിയെ കാറില്‍ തട്ടിക്കൊണ്ടു പോയത്. ഒരു ദിവസം കഴിഞ്ഞ് കുഞ്ഞിനെ കൊല്ലം ആശ്രാമം മൈതാനത്ത് ഉപേക്ഷിക്കുകയുമായിരുന്നു. പ്രതികളെ ഡിസംബര്‍ ഒന്നിനാണ് പിടികൂടിയത്.
സാമ്പത്തിക ബാധ്യത മറികടക്കാനാണ് പ്രതികള്‍ കുറ്റകൃത്യം നടത്തിയത്.അമ്മ അനിതകുമാരിക്കൊപ്പം അട്ടക്കുളങ്ങര വനിത ജയിലിലാണ് അനുപമ. അച്ഛന്‍ പത്മകുമാര്‍ പൂജപ്പുര സെന്‍ട്രല്‍ ജയിലില്‍.
