ആയിരക്കണക്കിന് പേര്‍ തടിച്ചുകൂടിയ ഭോലെ ബാബയുടെ സത്സംഗ് വേദിയില്‍ 15ഓളം പേര്‍ ശ്വാസം മുട്ടിക്കാനുള്ള വിഷം സ്പ്രേ ചെയ്തെന്നും അത് അപകടത്തിന് കാരണമായെന്നും ബാബയുടെ അഭിഭാഷകന്‍. ഭോലെ ബാബയുടെ ഉയരുന്ന ജനപ്രീതി തകര്‍ക്കാനാണ് ഈ അട്ടിമറി നടന്നതെന്ന് എ.പി. സിങ്ങ് വാര്‍ത്താസമ്മേളനത്തില്‍ പറഞ്ഞു.
15ഓ 16ഓ പേര്‍ ഇത്തരം സ്പ്രേയുമായി നടക്കുന്ന കണ്ടതായി ദൃക്സാക്ഷികള്‍ പറയുന്നു. ഉത്തര്‍പ്രദേശിലെ ഒരു വലിയ രാഷ്‌ട്രീയ നേതാവിന് ഈ അട്ടമിറിയില്‍ കയ്യുള്ളതായി ചില ആരോപണങ്ങള്‍ ഉയരുന്നതിനിടെയാണ് വിഷസ്പ്രേയുടെ വിവരം ബാബയുടെ അഭിഭാഷകന്‍ പുറത്തുവിടുന്നത്. ദൃക്സാക്ഷികള്‍ ഇക്കാര്യം എന്നോട് പറഞ്ഞിരുന്നു. പിന്നീട് പോസ്റ്റ് മോര്‍ട്ടം റിപ്പോര്‍ട്ട് കണ്ടപ്പോള്‍ എന്റെ സംശയം ബലപ്പെട്ടു. പലരും കൊല്ലപ്പെട്ടത് ചവിട്ടുകൊണ്ടിട്ടല്ല, പകരം ശ്വാസം മുട്ടിയാണ്.- അദ്ദേഹം പറഞ്ഞു.
ഹത്രാസിലെ സത്സംഗ വേദിയില്‍ ഉണ്ടായ തിക്കിലും തിരക്കിലും പെട്ട് സ്ത്രീകളും കുട്ടികളും ഉള്‍പ്പെടെ 121 പേര്‍ മരണപ്പെട്ടിരുന്നു.
