ന്യൂദല്ഹി: തുടര്ച്ചയായി മൂന്നാം തവണയും ഭാരതത്തിന്റെ പ്രധാനമന്ത്രിയായി ചുമതലയേറ്റ നരേന്ദ്ര മോദിക്ക് ചൈനീസ് പ്രധാനമന്ത്രി ലി ക്വിയാങ്ങിന്റെ അഭിനന്ദനങ്ങള്. നരേന്ദ്ര മോദി പ്രധാനമന്ത്രിയായി സത്യപ്രതിജ്ഞ ചെയ്ത് മൂന്ന് ദിവസങ്ങള്ക്ക് ശേഷമാണ് അഭിനന്ദനവുമായി ലി ക്വിയാങ് രംഗത്തെത്തിയത്. ലി ക്വിയാങ്ങിന്റെ അഭിനന്ദന സന്ദേശം ഭാരതത്തിലെ ചൈനയുടെ സ്ഥാനപതി സു ഫെയ്ഹോങ് എക്സില് പങ്കുവയ്ക്കുകയായിരുന്നു.
വീണ്ടും പ്രധാനമന്ത്രിയായുള്ള പുതിയ തുടക്കത്തിന് നരേന്ദ്ര മോദിക്ക് അഭിനന്ദനങ്ങള്. ഭാരതവും ചൈനയും തമ്മിലുള്ള ബന്ധത്തിന്റെ സുസ്ഥിരമായ വികസനം ഇരുരാജ്യങ്ങളിലെയും ജനങ്ങളുടെ ക്ഷേമത്തിന് മാത്രമല്ല മേഖലയ്ക്കാകെയും ലോകത്തിനും സുസ്ഥിരവും ശുഭസൂചകവുമായ ഒരു ഊര്ജം നല്കുന്നു. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശരിയായ രീതിയില് മുന്നോട്ട് കൊണ്ടുപോകുന്നതിന് ഭാരതവുമായി ചേര്ന്ന് പ്രവര്ത്തിക്കാന് തയാറാണെന്നും സന്ദേശത്തില് പറയുന്നു.
