ടെല്അവീവ് : ഇസ്രയേലിന് നേരെ മിന്നലാക്രമണം നടത്തിയെന്ന് ഹമാസ്. ടെല് അവീവ് ലക്ഷ്യമാക്കി തുടരെ എട്ട് മിസൈലുകള് തൊടുത്തതായി ഹമാസ് സായുധവിഭാഗമായ അല് ഖസാം ബ്രിഗേഡ്സാണ് അറിയിച്ചത്.
ഗാസയിലെ റാഫയില് നിന്നാണ് ഹമാസ് മിസൈല് ആക്രമണം നടത്തിയതെന്നാണ് റിപ്പോര്ട്ട് അതേസമയം മിസൈലുകള് മിക്കതും ഇസ്രയേലി മിസൈല് പ്രതിരോധ സംവിധാനം തകര്ത്തതായാണ് വിവരം. സിവിലിയന്മാരെ ഇസ്രായേല് കൊന്നൊടുക്കുന്നതിന് തിരിച്ചടിയായാണ് ആക്രമണമെന്ന് അല് ഖസം ബ്രിഗേഡ്സ് പറഞ്ഞു. .
മിന്നലാക്രമണത്തില് ടെല് അവീവിലെ നിരവധി കെട്ടിടങ്ങള്ക്ക് കേടുപാടുകള് സംഭവിച്ചതായാണ് വിവരം. എന്നാല് ആക്രമണത്തില് ആളപായം റിപ്പോര്ട്ട് ചെയ്തിട്ടില്ലെന്ന് ഇസ്രയേലി എമര്ജന്സി മെഡിക്കല് സര്വീസ് അറിയിച്ചു.
നേരത്തെ ഇസ്രയേലിനെതിരെ ആക്രമണം നടത്തുമെന്ന് ഇറാന് പിന്തുണയുള്ള ഹെസ്ബുള്ള ഗ്രൂപ്പ് വെളിപ്പെടുത്തിയിരുന്നു.
കഴിഞ്ഞ ഒക്ടോബറില് ഹമാസ് ഇസ്രായേലില് കടന്നു കയറി നടത്തിയ ആക്രമണത്തിന് പിന്നാലെയാണ് ഇസ്രയേല്- ഹമാസ് യുദ്ധം ആരംഭിച്ചത്.
