ന്യൂദല്ഹി: മൂന്നാം തവണയും ബിജെപി അധികാരത്തിലെത്തുമെന്ന് ആവര്ത്തിച്ച് പ്രധാനമന്ത്രി നരേന്ദ്രമോദി. അധികാരത്തില് എത്തിയാല് ആദ്യ നൂറുദിവസത്തേക്കുള്ള കര്മപദ്ധതി തയാറാക്കിയിട്ടുണ്ട്. യുവാക്കള്ക്കുവേണ്ടി അത് 125 ദിവസമാക്കി ഉയര്ത്താനാണ് ആലോചിക്കുന്നത്. ഒരു ദേശീയ മാധ്യമത്തിന് നല്കിയ അഭിമുഖത്തില് സംസാരിക്കുകയായിരുന്നു അദ്ദേഹം.
മൂന്നാംടേമിലെ ആദ്യത്തെ നൂറു ദിവസത്തേക്കുള്ള രൂപരേഖ തയാറാക്കിയിരുന്നു. രാജ്യത്തെ യുവാക്കളെ കേന്ദ്രീകരിച്ച് പദ്ധതിയിലേക്ക് 25 ദിവസം കൂടി കൂട്ടിച്ചേര്ക്കാന് ആലോചിക്കുകയാണ്. രാജ്യത്തിന്റെ ഭാവി രൂപപ്പെടുത്തുന്നതില് യുവാക്കളുടെ പങ്ക് നിര്ണായകമാണ്. 2047ല് വികസിതഭാരതമെന്ന ലക്ഷ്യത്തിനായി രാജ്യത്തെ യുവാക്കളുടെ ആശയങ്ങള്ക്ക് മുന്ഗണന നല്കണമെന്നാണ് ആഗ്രഹം. രാജ്യത്തെ യുവജനങ്ങള്ക്കായി 25 ദിവസം സമര്പ്പിക്കാന് ആഗ്രഹിക്കുന്നു.
അതിനായി നൂറില് നിന്ന് 125 ദിവസങ്ങളായി ഉയര്ത്തുകയാണ്. നൂറു ദിവസത്തേക്കുള്ള രൂപരേഖ തയാറാക്കുന്നതിനായി രാജ്യത്തുടനീളമുള്ള 20 ലക്ഷത്തിലധികമാളുകളില് നിന്ന് ആശയങ്ങള് സ്വീകരിച്ചിരുന്നതായും മോദി പറഞ്ഞു. തുടര്ച്ചയായി മൂന്നാം തവണയും റെക്കോര്ഡ് വിജയം നേടുമെന്നും അദ്ദേഹം കൂട്ടിച്ചേര്ത്തു.
