തിരുവനന്തപുരം:സംസ്ഥാനത്ത് ലൗ ജിഹാദ് ഉണ്ടെന്നും തന്റെ ചില സുഹൃത്തുക്കളുടെ മക്കള് അതിന് ഇരകളായിട്ടുണ്ടെന്നും ബിജെപി നേതാവ് പത്മജ വേണുഗോപാല്. ലൗ ജിഹാദായിട്ട് ഉണ്ടെന്ന് തനിക്കൊരു സ്ഥിരീകരണമില്ലെങ്കിലും അത് നടക്കുന്നുണ്ടെന്നാണ് പലരും പറയുന്നതെന്നും പത്മജ പറഞ്ഞു.
നിരവധി മാതാപിതാക്കള് ലൗ ജിഹാദ് ഉണ്ടെന്നാണ് തന്നോട് പറഞ്ഞിട്ടുളളത്. ലൗ ജിഹാദ് എന്നത് ശരിയാണോ തെറ്റാണോ എന്നതിനെക്കുറിച്ച് അന്വേഷണം നടത്തണം. ഇന്നത്തെ തലമുറ പലതും പഠിക്കണം. ഉണ്ടോ ഇല്ലയോ എന്നുള്ളതല്ല. ഇങ്ങനെ ഉണ്ട് എന്ന് വാര്ത്ത പരക്കുമ്പോള് അതിനെക്കുറിച്ച് കുട്ടികള്ക്ക് സന്ദേശം നല്കണം. അപ്പോള് ഏതാണ് ശരി, ഏതാണ് തെറ്റ് എന്ന് അവര്ക്ക് മനസിലാകും. ദി കേരള സ്റ്റോറി സിനിമ പ്രദര്ശിപ്പിച്ചതിനെ തുടര്ന്നുളള വിവാദത്തിന്റെ പശ്ചാത്തലത്തിലായിരുന്നു പത്മജ ഇങ്ങനെ പറഞ്ഞത്.
മുന് മുഖ്യമന്ത്രിമാരുടെ മക്കള് ഇനിയും ബിജെപിയിലേക്ക് വരുമെന്നാണ് കരുതുന്നത്. തലേദിവസം വരെ കോണ്ഗ്രസിനുവേണ്ടി പ്രവര്ത്തിച്ച താന് ഒരുദിവസം രാത്രിയിലാണ് ബിജെപിയില് ചേരാന് തീരുമാനമെടുക്കുന്നതെന്നും പത്മജ പറഞ്ഞു. ഒരുരാത്രി മതി കാര്യങ്ങള് മാറിമറിയാന്. ന്യൂനപക്ഷങ്ങള് ഇപ്പോള് ബിജെപിയോട് അടുത്തുകൊണ്ടിരിക്കുകയാണെന്നും തൃശൂര് മണ്ഡലത്തിലുള്പ്പടെ അവരുടെ പിന്തുണ ബിജെപിക്ക് ലഭിക്കുമെന്നും പത്മജ പറഞ്ഞു.
