ഒരു വര്‍ഷത്തില്‍ വരുന്ന 24 ഏകാദശികളുടെ പേരുകളും സവിശേഷതകളും ഇങ്ങനെ:
കാമദാ ഏകാദശി
ചൈത്രത്തിലെ ശുക്ലപക്ഷ ഏകാദശിയാണ് കാമദാ ഏകാദശി
പാപമോചിനി ഏകാദശി
ചൈത്രത്തിലെ കൃഷ്ണപക്ഷ ഏകാദശിയാണിത്. ഈ നാളില്‍ മഹാവിഷ്ണുവിന് അര്‍ഘ്യം നല്‍കി, ഷോഡാശോപചാരപൂജ നടത്തുന്നത് നല്ലതാണ്.
മോഹിനി ഏകാദശി
വൈശാഖത്തിലെ ശുക്ലപക്ഷ ഏകാദശിയാണ് മോഹിനി ഏകാദശി
വരുഥിനീ ഏകാദശി
വൈശാഖത്തിലെ കൃഷ്ണപക്ഷ ഏകാദശി. ഈ നാളില്‍ വ്രതമെടുത്താല്‍ സുഖസൗഭാഗ്യങ്ങള്‍ സിദ്ധിക്കുന്നു. ഈ ദിവസം വേപ്പിന്‍ കമ്പ് ഒടിക്കരുത് എന്നൊരു വിശ്വാസമുണ്ട്.
നിര്‍ജലാ ഏകാദശി
ജ്യേഷ്ഠത്തിലെ ശുക്ലപക്ഷ ഏകാദശിയായ നിര്‍ജലാ ഏകാദശി നാളില്‍ ജലപാനം പോലും നിഷിദ്ധമാണ്. നിഷ്ഠയോടെ വ്രതമനുഷ്ഠിച്ചാല്‍ ദീര്‍ഘായുസ്സും കൈവല്യ പ്രാപ്തിയുമുണ്ടാകുമെന്നാണു വിശ്വാസം.
അപരാ ഏകാദശി
ജ്യേഷ്ഠത്തിലെ കൃഷ്ണപക്ഷ ഏകാദശി. അചലാ ഏകാദശിയെന്നും ഇത് അറിയപ്പെടുന്നു. ഈ ഏകാദശി നോറ്റാല്‍ ബ്രഹ്മഹത്യാപാപത്തില്‍ നിന്നും മോചനം സിദ്ധിക്കുന്നു.
ശയനൈകാദശി
ആഷാഢത്തിലെ ശുക്ലപക്ഷ ഏകാദശിയാണിത്. ദേവശയനീ, ഹരിശയനീ എന്നും പേരുകളുണ്ട്. മഹാവിഷ്ണു ഒരു വര്‍ഷത്തില്‍ നാലുമാസം നിദ്രയിലാണെന്ന് ഒരു വിശ്വാസമുണ്ട്. ആ നിദ്ര ആരംഭിക്കുന്ന ദിവസമാണിത്. കാര്‍ത്തിക മാസത്തിലെ ശുക്ലപക്ഷഏകാദശി നാളിലാണ് മഹാ വിഷ്ണു ഉറക്കമുണരുന്നത്. ഈ നാലുമാസക്കാലം ചാതുര്‍മാസ്യം എന്ന റിയപ്പെടുന്നു. നിദ്രവിട്ടുണരുന്ന ഏകാദശിയാണ് ഉത്ഥാനൈകാദശി. കൃഷി ഒഴിച്ചുള്ള ശുഭകര്‍മ്മങ്ങള്‍ ഇക്കാലത്ത് നടത്താന്‍ പാടില്ലെന്നാണ് വിശ്വാസം. ശയനൈകാദശി വ്രതമെടുത്താല്‍ സര്‍വാഭീഷ്ടസിദ്ധിയാണ് ഫലം.
യോഗിനി ഏകാദശി
ആഷാഢത്തിലെ കൃഷ്ണപക്ഷ ഏകാദശി. ഈ ദിനത്തില്‍ ദരിദ്രര്‍ക്ക് ആഹാരം നല്‍കുന്നത് ശ്രേയസ്‌കരമാണ്.
പുത്രദാ ഏകാദശി
ശ്രാവണത്തിലെ ശുക്ലപക്ഷ ഏകാദശി. ഈ നാളില്‍ വ്രതമനുഷ്ഠിച്ച് ഉത്തമബ്രാഹ്മണര്‍ക്ക് ഭോജനവും ദാനവും നല്‍കുകയും ചെയ്താല്‍ സന്താനഭാഗ്യമുണ്ടാകുമെന്നാണ് വിശ്വാസം.
കാമികാ ഏകാദശി
ശ്രാവണത്തിലെ കൃഷ്ണപക്ഷ ഏകാദശി. പവിത്രഏകാദശിയെന്നും അറിയപ്പെടുന്നു. ബ്രഹ്മഹത്യാപാപശാന്തിക്കായി ഈ വ്രതം അനുഷ്ഠിക്കാം.
പരിവര്‍ത്തനൈകാദശി
പ്രൗഷ്ഠപദമാസത്തിലെ ശുക്ലപക്ഷ ഏകാദശി. പാല്‍ക്കടലില്‍ അനന്തനാകുന്ന മെത്തയില്‍ ശയിക്കുന്ന ഭഗവാന്‍ വിഷ്ണു തിരിഞ്ഞുകിടക്കുന്നത് അഥവാ പരിവര്‍ത്തനം ചെയ്യുന്നത് ഈ ദിവസമാണെന്നു വിശ്വസിക്കുന്നു. വിഷ്ണു
പ്രീതിയും ലക്ഷ്മിപ്രീതിയും നേടാന്‍ ഈ വ്രതാനുഷ്ഠാനം സഹായിക്കുന്നു. അന്ന് ലക്ഷ്മീപൂജ നടത്തുന്നത് ഐശ്വര്യപ്രദമാണ്.
അജപദ ഏകാദശി
പ്രൗഷ്ഠപദത്തിലെ കൃഷ്ണപക്ഷ ഏകാദശി. അന്ന് ഉറക്കമിളച്ച് വിധിപ്രകാരം വ്രതം അനുഷ്ഠിക്കുന്നത് സര്‍വപാപങ്ങളുമകറ്റും.
(തുടരും)
