ചരിത്രം തിരുത്തി സണ്‍റൈസേഴ്‌സ്; രണ്ടാം പരാജയം വഴങ്ങി മുംബൈ ഇന്ത്യന്‍സ്‌

ഹൈദരാബാദ്: സിക്‌സറുകളുടെയും ബൗണ്ടറികളുടെയും ചാകര കണ്ട ഐപിഎല്‍ ത്രില്ലറില്‍ വിജയക്കൊടി പാറിച്ച് സണ്‍റൈസേഴ്‌സ് ഹൈദരാബാദ്.

അഞ്ചു തവണ ചാംപ്യന്‍മാരായ മുംബൈ ഇന്ത്യന്‍സിനെ 31 റണ്‍സിനാണ് സണ്‍റൈസേഴ്‌സ് വീഴ്‌ത്തിയത്. പാറ്റ് കമ്മിന്‍സും സംഘവും സീസണിലെ ആദ്യത്തെ വിജയം സ്വന്തമാക്കിയപ്പോള്‍ ഹാര്‍ദിക് പാണ്ഡ്യയുടെ മുംബൈ ഇന്ത്യന്‍സിനു തുടര്‍ച്ചയായി രണ്ടാമത്തെ പരാജയമാണ് നേരിട്ടത്.

278 റണ്‍സിന്റെ റെക്കോര്‍ഡ് വിജയലക്ഷ്യമാണ് മുംബൈയ്‌ക്കു ഹൈദരാബാദ് നല്‍കിയത്. മറുപടിയില്‍ മുംബൈ ഇതേ നാണയത്തില്‍ തന്നെ തിരിച്ചടിച്ചെങ്കിലും വിജയലക്ഷ്യം എത്തിപ്പിടിക്കാവുന്നതിലും അപ്പുറമായിരുന്നു.

ചരിത്രത്തിലെ ഏറ്റവും ഉയര്‍ന്ന വിജയലക്ഷ്യം പിന്തുടര്‍ന്ന മുംബൈ ഇന്ത്യന്‍സിന് രോഹിത് ശര്‍മ്മയും ഇഷാന്‍ കിഷനും മികച്ച തുടക്കമാണ് സമ്മാനിച്ചത്. 3.2ാം ഓവറില്‍ ആദ്യ വിക്കറ്റ് വീണപ്പോള്‍ മുംബൈ സ്‌കോര്‍ 56 റണ്‍സായിരുന്നു. 13 പന്തില്‍ 34 റണ്‍സെടുത്ത ഇഷാന്‍ കിഷനാണ് മുംബൈ നിരയില്‍ ആദ്യം പുറത്താവുന്നത്. ഇഷാന്‍ കിഷനെ ഷഹ്ബാസ് അഹമ്മദ് ഐഡന്‍ മാര്‍ക്രത്തിന്റെ കൈകളിലെത്തിക്കുകയായിരുന്നു. അധികം വൈകാതെ രോഹിത് ശര്‍മ്മ 12 പന്തില്‍ 26 റണ്‍സെടുത്ത് പാറ്റ് കമ്മിന്‍സിന് വിക്കറ്റ് നല്‍കി മടങ്ങി.

പിന്നീട് ക്രീസിലൊരുമിച്ച തിലക് വര്‍മ്മ നമന്‍ ധിര്‍ സഖ്യം മുംബൈയ്‌ക്ക് വേണ്ടി പോരാട്ടം തുടര്‍ന്നു. ഇരുവരും ചേര്‍ന്ന് 84 റണ്‍സാണ് കൂട്ടിച്ചേര്‍ത്തത്. 14 പന്തില്‍ 30 റണ്‍സെടുത്ത നമന്‍ ധിറിനെ മടക്കി ജയ്‌ദേവ് ഉനദ്കട്ടാണ് ഈ കൂട്ടുകെട്ട് തകര്‍ത്തത്. പകരമെത്തിയ ക്യാപ്റ്റന്‍ ഹാര്‍ദ്ദിക് പാണ്ഡ്യയ്‌ക്ക് സ്‌കോര്‍ ഉയര്‍ത്താനായില്ല. തിലക് വര്‍മ്മ മികച്ച രീതിയില്‍ ബാറ്റുവീശിയപ്പോള്‍ അവസാന ആറ് ഓവറില്‍ മുംബൈയ്‌ക്ക് വിജയിക്കാന്‍ 96 റണ്‍സ് വേണമെന്നായി.

എന്നാല്‍ 15ാം ഓവറിലെ ആദ്യ പന്തില്‍ തിലക് വര്‍മ്മയെ കമ്മിന്‍സ് പുറത്താക്കിയത് മുംബൈയ്‌ക്ക് തിരിച്ചടിയായി. 34 പന്തില്‍ 64 റണ്‍സെടുത്ത തിലക് വര്‍മ്മ മുംബൈയുടെ ടോപ് സ്‌കോററായാണ് മടങ്ങിയത്. പകരമിറങ്ങിയ ടിം ഡേവിഡിനൊപ്പം പാണ്ഡ്യ ടീം സ്‌കോര്‍ 200 കടത്തി. എന്നാല്‍ ഹൈ റണ്‍ ചേസില്‍ മുംബൈ നായകന് 20 പന്തില്‍ നിന്ന് 24 റണ്‍സ് മാത്രമേ നേടാനായുള്ളൂ. 18ാം ഓവറിലെ അവസാന പന്തില്‍ പാണ്ഡ്യയെ ജയ്‌ദേവ് ഉനദ്കട്ട് പവിലിയനിലെത്തിച്ചു. ടിം ഡേവിഡിന്റെയും (42) റൊമേരിയോ ഷെപ്പേര്‍ഡിന്റെയും (15) ചെറുത്തുനില്‍പ്പും റെക്കോര്‍ഡ് വിജയലക്ഷ്യം മറികടക്കാന്‍ മുംബൈയെ സഹായിച്ചില്ല.

നേരത്തെ ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ സണ്‍റൈസേഴ്‌സ് നിശ്ചിത 20 ഓവറില്‍ മൂന്ന് വിക്കറ്റ് നഷ്ടത്തില്‍ 277 റണ്‍സാണ് അടിച്ചുകൂട്ടിയത്. ഐപിഎല്ലില്‍ ഒരു ടീം നേടുന്ന ഏറ്റവും വലിയ ടോട്ടല്‍ ആണിത്. റോയല്‍ ചലഞ്ചേഴ്‌സ് ബെംഗളൂരു കുറിച്ച 263 ടോട്ടലാണ് ഹൈദരാബാദ് പഴങ്കഥയാക്കിയത്.

ഈ സീസണില്‍ ആദ്യമായി ഒരു ഇന്നിങ്‌സില്‍ മൂന്ന് താരങ്ങള്‍ അര്‍ദ്ധസെഞ്ചുരി തികയ്‌ക്കുന്ന അപൂര്‍വ്വ കാഴ്‌ച്ചയും മുംബൈ ഇന്ത്യന്‍സിനെതിരായ കളിയില്‍ കണ്ടു.
ടോസ് മുംബൈയ്‌ക്കായിരുന്നു. തുടക്കത്തിലേ മായങ്ക് അഗര്‍വാളിനെ(11) നഷ്ടപ്പെട്ടെങ്കിലും ട്രാവിസ് ഹെഡും(62) അഭിഷേക് ശര്‍മയും(63) ചേര്‍ന്ന് അടിച്ചു തകര്‍ത്തു. ഇരുവരുടെയും വെടിക്കെട്ട് ബാറ്റിങ് മികവില്‍ രണ്ടാം വിക്കറ്റില്‍ 3.4 ഓവറില്‍ 68 റണ്‍സിന്റെ പടുകൂറ്റന്‍ കൂട്ടുകെട്ടാണ് പിറന്നത്. ഇരുവരും 200ന് മേല്‍ പ്രഹരശേഷിയില്‍ ബാറ്റ് ചെയ്താണ് സ്‌കോര്‍ ചലിപ്പിച്ചത്. ഹെഡ് പുറത്തായ ശേഷം ക്രീസിലെത്തിയ എയ്‌ദെന്‍ മാര്‍ക്രവും തകര്‍ത്തു കളിച്ചു. താരം 28 പന്തില്‍ 42 റണ്‍സുമായി പുറത്താകാതെ നിന്നു. അഭിഷേക് പുറത്തായ ശേഷം ക്രീസിലെത്തിയ ഹെന്റിച്ച് ക്ലാസ്സെന്‍ നടത്തിയ വെടിക്കെട്ടില്‍ സ്‌കോര്‍ പിന്നെയു ം കുതിച്ചു. 34 പന്തുകള്‍ നേരിട്ട ക്ലാസ്സെന്‍ 80 റണ്‍സുമായി പുറത്താകാതെ നിന്നു.