പാലക്കാട്: ബിജെപിയുടെ തെരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്രമോദി നാളെ പാലക്കാടെത്തും. തെരഞ്ഞെടുപ്പ് തീയതി പ്രഖ്യാപിച്ചതിനു ശേഷം മോദിയുടെ ആദ്യ സന്ദര്‍ശനമാണിത്. ഇന്ന് കോയമ്പത്തൂരിലെ പൊതുപരിപാടിക്ക് ശേഷം നാളെ രാവിലെയാണ് പാലക്കാടെത്തുക.
രാവിലെ 10ന് മേഴ്സി കോളേജ് ഗ്രൗണ്ടില്‍ ഹെലികോപ്ടറില്‍ വന്നിറങ്ങുന്ന മോദി അവിടെനിന്നും കാര്‍ മാര്‍ഗം കോട്ടമൈതാനത്തെത്തും. മൈതാനത്തിന് മുമ്പിലെ അഞ്ചുവിളക്കിനു സമീപത്തുനിന്നും റോഡ്ഷോ ആരംഭിക്കും. ഹെഡ് പോസ്റ്റോഫീസിന് സമീപം സമാപിക്കും.
റോഡ് ഷോയ്‌ക്കുള്ള ഒരുക്കങ്ങളെല്ലാം അന്തിമഘട്ടത്തിലാണെന്ന് ബിജെപി സംസ്ഥാന വൈസ് പ്രസിഡന്റും പാലക്കാട് ലോകസഭാ മണ്ഡലം പ്രഭാരിയുമായ പി. രഘുനാഥ്, ട്രഷറര്‍ അഡ്വ. ഇ. കൃഷ്ണദാസ്, ജില്ലാ പ്രസിഡന്റ് കെ.എം. ഹരിദാസ്, ജന. സെക്രട്ടറി പി. വേണുഗോപാല്‍ എന്നിവര്‍ പത്രസമ്മേളനത്തില്‍ അറിയിച്ചു.
പാലക്കാട്, പൊന്നാനി, മലപ്പുറം മണ്ഡലങ്ങളിലെ എന്‍ഡിഎ സ്ഥാനാര്‍ത്ഥികളായ സി. കൃഷ്ണകുമാര്‍, അഡ്വ. നിവേദിത സുബ്രഹ്മണ്യന്‍, ഡോ.എം. അബ്ദുള്‍ സലാം, ബിജെപി ദേശീയ ജനറല്‍ സെക്രട്ടറി പ്രകാശ് ജാവദേക്കര്‍, സംസ്ഥാന അധ്യക്ഷന്‍ കെ. സുരേന്ദ്രന്‍ തുടങ്ങിയവര്‍ പങ്കെടുക്കും.
