പത്തനംതിട്ട : കേരളത്തില് ഇത്തവണ താമര വിരിയുമെന്ന് പ്രധാനമന്ത്രി നരേന്ദ്രമോദി.ലോക്സഭയില് 400ലധികം സീറ്റുകള് എന്ഡിഎ നേടുമെന്നും അദ്ദേഹം പറഞ്ഞു.
ബിജെപി സ്ഥാനാര്ത്ഥി അനില് ആന്റണിയുടെ തെരഞ്ഞെടുപ്പ് പ്രചാരണത്തിനായി പത്തനംതിട്ടയിലെത്തിയതായിരുന്നു നരേന്ദ്രമോദി. ശരണം വിളിയോടെയാണ് പ്രധാനമന്ത്രി പ്രസംഗം ആരംഭിച്ചത്.ബി ജെ പി ജയിച്ചാല് കേരളത്തില് വികസനം ഗ്യാരന്റിയാണ്.
കേരളത്തില് മാറി മാറി വരുന്നത് അഴിമതി സര്ക്കാരുകളാണെന്നും ജനങ്ങള് മാറി ചിന്തിക്കണമെന്നും പ്രധാനമന്ത്രി ആവശ്യപ്പെട്ടു. ഒരു തവണ കോണ്ഗ്രസ്, ഒരു തവണ എല്ഡിഎഫ് എന്ന രീതി മാറണം. എങ്കിലേ കേരളത്തിന് നീതി ലഭിക്കൂ. ഇവിടെ ഇടതു-വലതു മുന്നണികള് പരസ്പരം പോരടിക്കുന്നു. എന്നാല് ദല്ഹിയില് ഇവര് ബന്ധുക്കളാണ്. പരസ്പരം അഴിമതിക്കാരെന്ന് വിളിക്കുന്നവര് ദല്ഹിയില് സഖ്യത്തിലാണ്.
പൂഞ്ഞാറില് വൈദികന് ആക്രമിക്കപ്പെട്ട സംഭവമും നരേന്ദ്രമോദി പരാമര്ശിച്ചു.ഇടതുപക്ഷത്തിനും കോണ്ഗ്രസിനുമുള്ളത് കാലഹരണപ്പെട്ട ആശയങ്ങളാണ് .പാര്ലമെന്റില് പുരോഗമനാശയങ്ങളെ ഇരുകൂട്ടരും എതിര്ക്കുകയായിരുന്നു. മുത്തലാഖിനെ അവര് എതിര്ത്തതായും മോദി പറഞ്ഞു.
പതിറ്റാണ്ടുകള് ഇടതുപക്ഷം ഭരിച്ച ബംഗാളില് പിന്നെ അവര്ക്ക് അധികാരം കിട്ടിയില്ല. പതിറ്റാണ്ടുകള് ഭരിച്ച സംസ്ഥാനങ്ങളില് നിന്ന് കോണ്ഗ്രസ് പുറത്തായി. ഒബിസി കമ്മീഷനെ എതിര്ത്തവരാണ് എല്ഡിഎഫും യുഡിഎഫും എന്നും മോദി കുറ്റപ്പെടുത്തി.
ഒരു തവണ അധികാരത്തില് നിന്ന് പുറത്താക്കിയാല് പിന്നെ തിരിച്ചെത്തില്ല. തമിഴ്നാട്ടില് കോണ്ഗ്രസിന് അധികാരം നഷ്ടപ്പട്ടപ്പോള് അവര്ക്ക് തിരിച്ചുവരാനായില്ല.ഗുജറാത്തിലും ഉത്തര്പ്രദേശിലും പശ്ചിമബംഗാളിലും ഒഡീഷയിലും അധികാരം നഷ്ടമായ ശേഷം അവര് തിരിച്ചെത്തിയിട്ടില്ല.
ബംഗാളും ത്രിപുരയും കമ്യൂണിസ്റ്റുപാര്ട്ടിയെ പുറത്താക്കി. ഇനി ഒരിക്കലും അവിടെ അധികാരത്തിലെത്താന് അവര്ക്ക് കഴിയില്ലെന്നും മോദി പറഞ്ഞു.
