തിരുവനന്തപുരം: ബിജെപി മുന്നോട്ടു വയ്‌ക്കുന്ന അജണ്ടയാണ് വികസനവും പുരോഗതിയുമെന്നും വികസിത ഭാരതമാണ് നമ്മുടെ ലക്ഷ്യമെന്നും കേന്ദ്രമന്ത്രി രാജീവ് ചന്ദ്രശേഖര്‍. തിരുവനന്തപുരം പാര്‍ലമെന്റ് നിയോജക മണ്ഡലത്തിലെ എന്‍ഡിഎ തെരഞ്ഞെടുപ്പ് കമ്മറ്റി ഓഫീസിന്റെ ഉദ്ഘാടന ചടങ്ങില്‍ സംസാരിക്കുകയായിരുന്നു അദ്ദേഹം.
ഇന്ത്യയെ മൂന്നാമത്തെ സാമ്പത്തിക രാഷ്‌ട്രമായി വളര്‍ത്താന്‍ പ്രയത്‌നിക്കുന്ന നരേന്ദ്രമോദിയുടെ പ്രതിനിധിയാണ് താന്‍. കഴിഞ്ഞ പത്ത് വര്‍ഷമായി ഇന്ത്യ ഭരിക്കുന്ന നരേന്ദ്രമോദി സര്‍ക്കാര്‍ എന്തു ചെയ്തു, 2004 മുതല്‍ 2014 വരെ ഇന്ത്യ ഭരിച്ച കോണ്‍ഗ്രസ് സര്‍ക്കാര്‍ എന്തു ചെയ്തു, കഴിഞ്ഞ എട്ട് കൊല്ലമായി കേരളം ഭരിക്കുന്ന ഇടത് സര്‍ക്കാര്‍ എന്തു ചെയ്തു, ഈ സര്‍ക്കാരുകളുടെ പ്രവര്‍ത്തനങ്ങളുടെ പ്രോഗ്രസ് റിപ്പോര്‍ട്ടാണ് വരുന്ന തെരഞ്ഞെടുപ്പ്.
കഴിഞ്ഞ പത്ത് വര്‍ഷമായി ഇന്ത്യ മുന്നോട്ട് പോകുമ്പോള്‍ കേരളത്തിന്റെ തലസ്ഥാനമായ തിരുവനന്തപുരത്ത് എന്ത് വികസനം നടന്നുവെന്നും ഇവിടത്തെ കച്ചവടക്കാര്‍ക്കും മത്സ്യത്തൊഴിലാളികള്‍ക്കും യുവാക്കള്‍ക്കും എന്ത് പുരോഗതിയാണ് ഉണ്ടായതെന്നും അദ്ദേഹം ചോദിച്ചു.
