തിരുവനന്തപുരം : സംസ്ഥാനത്തെ സ്കൂള് ഉച്ച ഭക്ഷണ പാചക തൊഴിലാളികള്ക്ക് വേതന വിതരണത്തിനായി 16.31 കോടി രൂപ അനുവദിച്ചതായി ധനകാര്യ മന്ത്രി കെ എന് ബാലഗോപാല് . 13,560 തൊഴിലാളികളുടെ ഫെബ്രുവരിയിലെ വേതനം നല്കുന്നതിനാണ് തുക അനുവദിച്ചത്.
സംസ്ഥാനത്ത് സ്കൂള് ഉച്ചഭക്ഷണ പാചക തൊഴിലാളികള്ക്ക് 20 പ്രവൃത്തി ദിവസങ്ങളുള്ള ഒരു മാസത്തില് 13,500 രുപവരെ വേതനം ലഭിക്കുന്നുണ്ട്. കേന്ദ്ര വിഹിതം വളരെ കുറവാണെന്നും 12,900 രൂപ സംസ്ഥാന ഫണ്ടില്നിന്നാണ് നല്കുന്നതെന്നും മന്ത്രി പറഞ്ഞു.
കേരളത്തില് പ്രതിദിന വേതനം 600 മുതല് 675 രൂപ വരെ നല്കുന്നുണ്ട്. നാമമാത്ര സഹായം പിഎം പോഷണ് അഭിയാനില്നിന്നാണ് ലഭിക്കേണ്ടത്. പദ്ധതിയില് ഈവര്ഷം സംസ്ഥാനത്തിന് 284 കോടി രൂപയാണ് കേന്ദ്ര വിഹിതമായി ലഭിക്കേണ്ടത്.ഇതില് 178 കോടി രൂപ മാത്രമാണ് ഇതുവരെ അനുവദിച്ചത്.106 കോടി രൂപ ലഭിക്കാനുണ്ട്. കുട്ടികള്ക്ക് ഉച്ചഭക്ഷണ വിതരണം മുടങ്ങാതിരിക്കാന് സംസ്ഥാനം ഇതിനകം 138.88 കോടി രൂപ നല്കി. പാചക ചെലവ് ഇനത്തില് കഴിഞ്ഞ മാസം 19.82 കോടി രൂപ നല്കിയെന്നും മന്ത്രി വെളിപ്പെടുത്തി.
