മധ്യപ്രദേശില് പതിനാറര വര്ഷത്തോളം (16.5) മുഖ്യമന്ത്രിയായിരുന്ന ശിവരാജ് ചൗഹാന് ഇക്കുറി പക്ഷെ എംഎല്എ ആയെങ്കിലും മുഖ്യമന്ത്രിസ്ഥാനം കൊടുത്തില്ല. പകരം കേന്ദ്ര രാഷ്ട്രീയത്തിലേക്ക് അദ്ദേഹത്തെ കൊണ്ടുപോവുകയാണ് ബിജെപി. മധ്യപ്രദേശിലെ വിദിഷ ലോക് സഭാ മണ്ഡലത്തില് നിന്നും മത്സരിക്കും. ജയിക്കുമെന്ന കാര്യത്തില് ആര്ക്കും സംശയവും വേണ്ട. കാരണം 2006 മുതല് ബുധിനി എന്ന മണ്ഡലത്തില് നിന്നും എംഎല്എ ആയിരുന്നു. അതിന് മുന്പ് 1990 മുതല് 1991 വരെയും എംഎല്എ ആയിരുന്നു.
കോണ്ഗ്രസില് നിന്നും ബിജെപിയിലേക്ക് വന്നതിന് ശേഷം ഇപ്പോള് കേന്ദ്ര വ്യോമയാനമന്ത്രിയായ ജ്യോതിരാദിത്യ സിന്ധ്യ ഇക്കുറി ബിജെപി ടിക്കറ്റില് മത്സരിക്കും. മധ്യപ്രദേശിലെ ഗുണ മണ്ഡലത്തില് നിന്നാണ് ജ്യോതിരാദിത്യ സിന്ധ്യ മത്സരിക്കുക. 2019ല് കോണ്ഗ്രസ് ടിക്കറ്റില് മത്സരിച്ച ജ്യോതിരാദിത്യ സിന്ധ്യയെ ബിജെപി തോല്പിച്ചിരുന്നു. 2002 മുതല് ജ്യോതിരാദിത്യ സിന്ധ്യ സ്ഥിരം ജയിക്കുന്ന മണ്ഡലമായിരുന്നിട്ടും 2019ല് ബിജെപിയുടെ കൃഷ്ണപാല് സിങ്ങ് യാദവില് നിന്നും തോല്വി ഏറ്റുവാങ്ങേണ്ടി വന്നു. 1999 മുതല് ജ്യോതിരാദിത്യസിന്ധ്യയുടെ അച്ഛന് മാധവ് റാവു സിന്ധ്യ വിജയിച്ച മണ്ഡലമാണ്.
അന്തരിച്ച കേന്ദ്രമന്ത്രിയായിരുന്ന സുഷമ സ്വരാജിന്റെ മകള് ബാംസുരി സ്വരാജിന് ബിജെപി ന്യൂദല്ഹി ലോക്സഭാ സീറ്റ് നല്കിയിട്ടുണ്ട്. ഇപ്പോള് ബിജെപിയുടെ ദല്ഹി ലീഗല് സെല്ലിന്റെ കോകണ്വീനറാണ് ബാംസുരി സ്വാരാജ്. ഇതാദ്യമായാണ് ഇവര് തെരഞ്ഞെടുപ്പില് മത്സരിക്കുന്നത്. ഇപ്പോള് കേന്ദ്രമന്ത്രിയായ മീനാക്ഷി ലേഖി 2019ല് ജയിച്ച മണ്ഡലമാണ് ന്യൂദല്ഹി. ഏകദേശം രണ്ടരലക്ഷം വോട്ടുകളുടെ ഭൂരിപക്ഷത്തിന് കോണ്ഗ്രസിന്റെ അജയ് മാക്കനെയാണ് മീനാക്ഷി ലേഖി മലര്ത്തിയടിച്ചത്.
പ്രതികരിക്കാൻ ഇവിടെ എഴുതുക: