പാരിപ്പള്ളി: ജില്ലാ അതിർത്തിയിൽ ചാവർകോട് കാറ്റാടി മുക്കിൽ ആൾത്താമസമില്ലാത്ത പുരയിടത്തിൽ തെരുവുനായ്ക്കൾ ഭക്ഷിച്ച നിലയിൽ കണ്ടെത്തിയ മൃതദേഹം ആരുടേതെന്ന് തിരിച്ചറിഞ്ഞു. ഡിഎൻഎ പരിശോധനയിലൂടെയാണ് ആളെ തിരിച്ചറിഞ്ഞത്. ചാവർക്കോട് കാറ്റാടിമക്ക് സ്വദേശി അജിത്താണ് മരിച്ചത്.
കഴിഞ്ഞ മാസം 19-ന് വൈകിട്ട് പറങ്കിമാവ് തോട്ടത്തിൽ വിറക് ശേഖരിക്കാനെത്തിയ സ്ത്രീയാണ് മൃതദേഹത്തിന്റെ അവശിഷ്ടങ്ങൾ കണ്ടത്. രൂക്ഷമായ ദുർഗന്ധവും തുണിക്കെട്ടിന് സമാന രീതിയിൽ എന്തോ കിടക്കുന്നതും കണ്ടതിനെ തുടർന്ന് നടത്തിയ തിരച്ചിലിലാണ് മൃതശരീരത്തിന്റെ ഭാഗങ്ങളാണെന്ന് കണ്ടെത്തിയത്.
അരയ്‌ക്ക് കീഴ്‌പ്പോട്ടുള്ള ഭാഗം നായ്‌ക്കൾ ഭക്ഷിച്ചിരുന്നു. മുഖവും കൈകളും നഷ്ടമായിരുന്നു. നെഞ്ചിന്റെ ഭാഗം മാത്രമായിരുന്നു അവശേഷിച്ചത്. കഴുത്തിൽ കുരുക്കിട്ട പ്ലാസ്റ്റിക് കയർ പൊട്ടിയ നിലയിലായിരുന്നു. പറങ്കിമാവിൽ പൊട്ടിയ പ്ലാസ്റ്റിക് കയറിന്റെ അവശേഷിച്ച ഭാഗവും കണ്ടെത്തിയിരുന്നു.
