കുണ്ടറ : സംഘര്ഷം അറിഞ്ഞെത്തിയ പൊലീസ് സംഘത്തെ ലഹരി മാഫിയ ആക്രമിച്ചു. നാല് പൊലീസുകാര്ക്ക് പരിക്കേറ്റതായാണ് വിവരം. ഗുണ്ടാ സംഘത്തിലെ നാല് പ്രതികളെ സാഹസികമായി പൊലീസ് പിടികൂടി.
ഞായറാഴ്ച വൈകിട്ട് ഏഴോടെ പൂജപ്പുര ക്ഷേത്രത്തിന് സമീപം കൂനംവിള ജംഗ്ഷനിലാണ് സംഭവമുണ്ടായത്. ക്ഷേത്രോത്സവത്തിനിടെ ഉണ്ടായ സംഘര്ഷത്തിന്റെ തുടര്ച്ചയായി ലഹരി മാഫിയ സംഘം യുവാവിനെ മര്ദ്ദിച്ചിരുന്നു.
ഈ വിവരമറിഞ്ഞ് എത്തിയ പൊലീസ് ഇവരെ പിടികൂടി ജീപ്പില് കയറ്റവെ ആക്രമിക്കുകയായിരുന്നു. പേരിനാട് മംഗലഴികത്ത് വീട്ടില് അഭിലാഷ് (31), കുഴിയം ലക്ഷ്മി വിലാസത്തില് ചന്തു നായര് (23), സനേഷ്, അനൂപ് എന്നിവരെ സംഭവ സ്ഥലത്തുനിന്ന് പൊലീസ് പിടികൂടി. മറ്റൊരു പ്രതി ഓടി രക്ഷപ്പെട്ടു.
മര്ദനമേറ്റ പൊലീസ് ഉദ്യോഗസ്ഥരെ കുണ്ടറ താലൂക്ക് ആശുപത്രിയില് പ്രവേശിപ്പിച്ചു.
