ലഖ്‌നൗ: അമേഠിയില്‍ നിന്നുള്ള എംപിയായ കേന്ദ്രമന്ത്രി സ്മൃതി ഇറാനി നാലു ദിവസെത്ത മണ്ഡല പര്യടനം തുടങ്ങി. ഇന്നലെ രാഹുലിന്റെ ഭാരത് ജോഡോ ന്യായ് യാത്രയും അമേഠിയില്‍ എത്തിയിട്ടുണ്ട്. കഴിഞ്ഞ തെരഞ്ഞെടുപ്പില്‍ രാഹുല്‍ ഇവിടെ സ്മൃതിയോട് തോറ്റിരുന്നു.
ഇക്കുറിയും രാഹുല്‍ ഇവിടെ മല്‍സരിക്കുന്നുണ്ടെന്നാണ് റിപ്പോര്‍ട്ടുകള്‍. എന്നാല്‍ സ്ഥിരീകരിച്ചിട്ടില്ല. കഴിഞ്ഞ തെരഞ്ഞെടുപ്പിലെ പോലെ അമേഠിയിലും വയനാട്ടിലും രാഹുല്‍ ഇക്കുറിയും മല്‍സരിക്കുമെന്നാണ് ഇതുവരെയുള്ള സൂചനകളും. ജനങ്ങളുമായി ഇഴുകിച്ചേര്‍ന്ന സ്മൃതി ഇവിടെ വീടുവരെ വച്ചു കഴിഞ്ഞു.
വിഷുപക്ഷിയേ പോലെ വല്ലപ്പോഴും വിരുന്നെത്തുന്ന രാഹുല്‍ ഇന്നലെ ന്യായ് യാത്രയുമായി മണ്ഡലത്തില്‍ എത്തിയിട്ടുണ്ട്. ഇതേ സമയത്താണ് സ്മൃതി ജനസംവാദങ്ങള്‍ ആരംഭിച്ചിരിക്കുന്നത്. നാലു ദിവസവും അമേഠിയിലെ പലയിടങ്ങളില്‍ പൊതുസദസ് സംഘടിപ്പിച്ചിട്ടുണ്ട്.
ഇവയിലാണ് സ്മൃതി ജനങ്ങളുമായി ആശയസംവാദം നടത്തുന്നതും അവരുടെ നിലപാടുകളും ആവശ്യങ്ങളും ചര്‍ച്ച ചെയ്യുന്നതും പരിഹാരം കണ്ടെത്തുന്നതും. ഗ്രാമങ്ങളിലെ പതിവു ഭവന സന്ദര്‍ശനങ്ങളും അവര്‍ നടത്തും. മണ്ഡല പര്യടനത്തിന് സമാപനം കുറിച്ചാണ്, 22നാണ് സ്മൃതി ഇവിടെ വച്ച പുതിയ വീടിന്റെ പാലു കാച്ചല്‍. സ്മൃതിയുടെ മണ്ഡല പ്രതിനിധി വിജയ് ഗുപ്തയും ഒപ്പമുണ്ട്.
