കണ്ണൂര്‍: വിവാഹം ദിവസം കതിര്‍മണ്ഡപത്തില്‍ എത്താതെ വരന്‍ മുങ്ങി. തുടര്‍ന്ന് ഇയാളെ കണ്ടെത്താന്‍ പൊലീസ് സഹായമഭ്യര്‍ത്ഥിച്ച് വധുവും ബന്ധുക്കളും കേളകം പൊലീസിനെ സമീപിച്ചു.
തലശേരി പൊന്ന്യം സ്വദേശിനിക്കാണ് ദുരനുഭവമുണ്ടായത്.ബുധനാഴ്ച രാവിലെ 10 മണിക്ക് ചോനാട് ക്ഷേത്രത്തില്‍ വച്ച് വിവാഹം നടത്താനാണ് നിശ്ചയിച്ചിരുന്നത്. ഇതനുസരിച്ച് പ്രതീക്ഷകളുമായി യുവതിയും ബന്ധുക്കളും രാവിലെ ക്ഷേത്രത്തില്‍ എത്തി.
മുഹൂര്‍ത്ത സമയമായിട്ടും യുവാവിനെ കാണാത്തതിനെ തുടര്‍ന്ന് ആശങ്കയിലായ വധുവിന്റെ ബന്ധുക്കള്‍ പലവണ ഫോണില്‍ ബന്ധപ്പെട്ടു. എന്നാല്‍, ഫോണില്‍ കിട്ടിയില്ല. തുടര്‍ന്ന് തന്റെ സ്വദേശമെന്ന് യുവാവ് നേരത്തേ യുവതിയെ ധരിപ്പിച്ചിരുന്ന കേളകത്ത് എത്തി. അന്വേഷണത്തില്‍ വിവരം ലഭിക്കാത്തതിനെ തുടര്‍ന്ന് പൊലീസ് സ്റ്റേഷനിലെത്തി യുവാവിന്റെ ഫോട്ടോ പൊലീസിന് കൈമാറി.
പൊലീസ് അന്വേഷണത്തില്‍ യുവാവ് തൊണ്ടിയില്‍ സ്വദേശി ജോബിഷ് ആണെന്ന് വ്യക്തമായി. പൊലീസ് അന്വേഷിക്കുന്നതറിഞ്ഞ ജോബിഷ് യുവതിയെ ഫോണില്‍ ബന്ധപ്പെട്ട് തനിക്ക് നാലുമണിക്കേ എത്താന്‍ കഴിയൂ എന്നും പിതാവിന് അസുഖമായതിനാല്‍ അടിയന്തരമായി ആശുപത്രിയില്‍ പോകേണ്ടിവന്നുവെന്നും അറിയിച്ചു.
പൊലീസ് നടത്തിയ അന്വേഷണത്തില്‍ വരന്റെ ശരിയായ ചിത്രം തെളിയുകയായിരുന്നു.ജോബിഷ് വിവാഹിതനാണെന്നും ബംഗളൂരുവിലാണ് താമസമെന്നും കണ്ടെത്തി. വഞ്ചിക്കപ്പെട്ടുവെന്ന് വ്യക്തമായ യുവതിയും ബന്ധുക്കളും കോടതിയെ സമീപിക്കാനുളള തീരുമാനത്തിലാണ്.
പ്രതികരിക്കാൻ ഇവിടെ എഴുതുക: