കൊച്ചി: ശ്രീരാമനെയും രാമായണത്തെയും സമൂഹ മാധ്യമത്തിലൂടെ അധിക്ഷേപിച്ച സിപിഐയുടെ തൃശ്ശൂര് എംഎല്എ പി. ബാലചന്ദ്രന്റെ നടപടി അംഗീകരിക്കാന് കഴിയില്ലെന്നും പരസ്യമായി മാപ്പ് പറയണമെന്നും വിശ്വഹിന്ദു പരിഷത്ത് സംസ്ഥാന അധ്യക്ഷന് വിജി തമ്പിയും ജനറല് സെക്രട്ടറി വി.ആര് രാജശേഖരനും ആവശ്യപ്പെട്ടു.
ഹൈന്ദവരോടുള്ള അന്ധമായ വിരോധമാണ് സമൂഹ മാധ്യമത്തിലൂടെ കമ്യൂണിസ്റ്റുകാരനായ പി. ബാലചന്ദ്രന് പ്രകടമാക്കിയത്. ഹൈന്ദവ വിരുദ്ധത തന്നെയാണ് ഇതിലൂടെ വ്യക്തമാകുന്നത്. ഒരു ജനപ്രതിനിധിയുടെ ഭാഗത്ത് നിന്ന് ഒരിക്കലും ഉണ്ടാകാന് പാടില്ലാത്ത നടപടിയാണ് ഇത്. ഹൈന്ദവസമൂഹം എക്കാലവും നെഞ്ചോടു ചേര്ത്തുവച്ചിരിക്കുന്നതാണ് ശ്രീരാമനും സീതയും ലക്ഷ്മണനും. അവരെ ആക്ഷേപിച്ചതിലൂടെ വിശ്വാസികളുടെ മനസിനാണ് മുറിവേറ്റിരിക്കുന്നത്. പോസ്റ്റ് പിന്വലിച്ചതുകൊണ്ടു മാത്രം ആ മുറിവുണങ്ങില്ല. വിഷയത്തില് പരസ്യമായി മാപ്പ് പറഞ്ഞില്ലെങ്കില് നിയമ നടപടിയുമായി മുന്നോട്ടു പോകുമെന്ന് വിഎച്ച്പി നേതാക്കള് വ്യക്തമാക്കി.
