ഗാന്ധിനഗര്‍: രാമക്ഷേത്രത്തോടുള്ള കോണ്‍ഗ്രസിന്റെ സമീപനത്തില്‍ പ്രതിഷേധിച്ച് ഗുജറാത്തിലെ മുതിര്‍ന്ന കോണ്‍ഗ്രസ് എംഎല്‍എ രാജിവച്ചു. സി.ജെ ചാവ്ദയാണ് രാജിവച്ചത്. ഇന്നലെ രാവിലെ ഗാന്ധിനഗറില്‍ സ്പീക്കര്‍ ശങ്കര്‍ ചൗധരിക്ക് രാജിക്കത്ത് സമര്‍പ്പിച്ചു.
ഞാന്‍ കോണ്‍ഗ്രസില്‍ നിന്ന് രാജിവച്ചു. 25 വര്‍ഷമായി കോണ്‍ഗ്രസില്‍ പ്രവര്‍ത്തിച്ചു. രാമക്ഷേത്രത്തില്‍ പ്രാണപ്രതിഷ്ഠ ചടങ്ങില്‍ രാജ്യത്തെ മുഴുവന്‍ ജനങ്ങളും ആഹ്ലാദഭരിതരാണ്. അതിന്റെ ഭാഗമാകുന്നതിന് പകരം കോണ്‍ഗ്രസ് കാണിച്ച സമീപനമാണ് ഞാന്‍ അസ്വസ്ഥമാകാന്‍ കാരണം, രാജിവച്ചതിന് ശേഷം സി.ജെ. ചാവ്ദ പറഞ്ഞു. പ്രധാനമന്ത്രി നരേന്ദ്ര മോദിയുടെയും ആഭ്യന്തര മന്ത്രി അമിത് ഷായുടെയും പ്രവര്‍ത്തനങ്ങളെയും നയങ്ങളെയും പിന്തുണയ്‌ക്കണം. പക്ഷേ, കോണ്‍ഗ്രസില്‍ ആയിരിക്കുമ്പോള്‍ എനിക്ക് അത് ചെയ്യാന്‍ കഴിയുമായിരുന്നില്ല. അദ്ദേഹം കൂട്ടിച്ചേര്‍ത്തു.
ചാവ്ദ രാജിവച്ചതോടെ 182 അംഗ ഗുജറാത്ത് നിയമസഭയില്‍ കോണ്‍ഗ്രസ് അംഗങ്ങളുടെ എണ്ണം 15 ആയി. നേരത്തെ ആനന്ദ് ജില്ലയിലെ ഖംഭാട്ടില്‍ നിന്നുള്ള കോണ്‍ഗ്രസ് എംഎല്‍എ ചിരാഗ് പട്ടേലും നിയമസഭയില്‍ നിന്ന് രാജിവച്ചിരുന്നു.
പ്രതികരിക്കാൻ ഇവിടെ എഴുതുക: