കായംകുളം: മുഖ്യമന്ത്രിയും മന്ത്രിമാരും സഞ്ചരിച്ച നവകേരള സദസ് ബസിന് നേരെ കരിങ്കൊടി കാട്ടിയ ഭിന്നശേഷിക്കാരനായ യൂത്ത് കോണ്‍ഗ്രസ് നേതാവിനെ മര്‍ദ്ദിച്ച പ്രതി അറസ്റ്റില്‍. കായംകുളത്ത് കഴിഞ്ഞ മാസം 16 നാണ് സംഭവമുണ്ടായത്. ഭിന്നശേഷിക്കാരനായ യൂത്ത് കോണ്‍ഗ്രസ് സംസ്ഥാന സെകട്ടറി അജിമോന്‍ കണ്ടല്ലൂരിനെയാണ് മര്‍ദ്ദിച്ചത്.
ഡി വൈ എഫ് ഐ പ്രവര്‍ത്തകനായ മാവേലിക്കര ഭരണിക്കാവ് വില്ലേജില്‍ തെക്കേ മങ്കുഴി പാപ്പാടിയില്‍ വീട്ടില്‍ അനൂപ് വിശ്വനാഥന്‍ (30) ആണ് അറസ്റ്റിലായത്. ഒളിവിലായിരുന്ന പ്രതി കേരള ഹൈക്കോടതിയുടെ നിര്‍ദ്ദേശപ്രകാരമാണ് പൊലീസ് മുമ്പാകെ കീഴടങ്ങിയത്. ഇയാളെ കോടതിയില്‍ ഹാജരാക്കി.
മുഖ്യമന്ത്രിയുടെ ബസിന് നേരെ കരിങ്കൊടി കാട്ടിയ അജിമോനെ പൊലീസുകാര്‍ എടുത്ത് മാറ്റിയശേഷം ഡിവൈഎഫ്ഐ പ്രവര്‍ത്തകര്‍ പിറകില്‍ കൂടി എത്തി ചവിട്ടുകയും മര്‍ദ്ദിക്കുകയുമായിരുന്നു. അജിമോനെ മര്‍ദ്ദിക്കുന്ന ദൃശ്യങ്ങള്‍ സാമൂഹ്യ മാധ്യമങ്ങളില്‍ പ്രചരിക്കുകയും വലിയ വിമര്‍ശനം ഉയരുകയും ചെയ്തിരുന്നു.
