കായിക പ്രേമികള്‍ക്ക് ആവേശമായി ദുബായ് മാരത്തോണ്‍: പങ്കെടുത്തത് വിവിധ രാജ്യങ്ങളില്‍ നിന്നുള്ള ആയിരക്കണക്കിന് അത്‌ലറ്റുകള്‍

ദുബായ്: ഇരുപത്തിമൂന്നാമത് ദുബായ് മാരത്തണ്‍ ജനുവരി ഏഴിന്, ഞായറാഴ്‌ച്ച നടന്നു. രാവിലെ 6 മണിമുതല്‍ ഉച്ചയ്‌ക്ക് ഒരു മണിവരെയാണ് ദുബായ് മാരത്തണ്‍ സംഘടിപ്പിച്ചത്. ദുബായ് സ്‌പോര്‍ട്‌സ് കൗണ്‍സിലിന്റെ പിന്തുണയോടെയാണ് ദുബായ് മാരത്തണ്‍ നടത്തുന്നത്. ഇതിന്റെ ഭാഗമായി നടന്ന 10 കിലോമീറ്റര്‍ റോഡ് റേസില്‍ വിവിധ രാജ്യങ്ങളില്‍ നിന്നുള്ള ആയിരക്കണക്കിന് പേരാണ് പങ്കെടുത്തത്.

ഇരുപത്തിമൂന്നാമത് ദുബായ് മാരത്തണ്‍ മത്സര വിജയികളെ ദുബായ് സ്‌പോര്‍ട്‌സ് കൗണ്‍സില്‍ ചെയര്‍മാന്‍ ഷെയ്ഖ് മന്‍സൂര്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം പുരസ്‌കാരങ്ങള്‍ നല്‍കി ആദരിച്ചു. ഉം സുഖേയിം റോഡില്‍ ഒരുക്കിയ ഇത്തവണത്തെ ദുബായ് മാരത്തണില്‍ അന്താരാഷ്‌ട്ര തലത്തിലുള്ള പ്രമുഖ ഓട്ടക്കാര്‍ പങ്കെടുത്തിരുന്നു. മിഡില്‍ ഈസ്റ്റിലെ ആദ്യത്തേതും ഏറ്റവും പഴക്കമുള്ളതുമായ മാരത്തണ്‍ മത്സരമാണ് ദുബായ് മാരത്തണ്‍.

പുരുഷ വിഭാഗം മാരത്തണില്‍ എത്തിയോപ്യന്‍ അത്‌ലീറ്റ് അദ്ദിസു ഗോബന (02:05:01 മണിക്കൂറില്‍ 42.195 കിലോമീറ്റര്‍ പിന്നിട്ടു) വിജയിയായി. എത്തിയോപ്യയുടെ തന്നെ ലെമി ദുമെച്ച (02:05:20 മണിക്കൂര്‍), ദെജെനെ മെഗെസ (02:05:42) എന്നിവര്‍ പുരുഷ വിഭാഗത്തില്‍ രണ്ടും, മൂന്നും സ്ഥാനം കരസ്ഥമാക്കി.

വനിതാ വിഭാഗം മാരത്തണില്‍ എത്തിയോപ്യന്‍ അത്‌ലീറ്റ് തിഗിസ്റ്റ് കെതെമ (02:16:07 മണിക്കൂര്‍) പുതിയ ദുബായ് മാരത്തണ്‍ റെക്കോര്‍ഡോടെ വിജയിച്ചു. എത്തിയോപ്യയുടെ തന്നെ റുതി ആഗ (02:18:09), ദേര ദിദ (02:19:29) എന്നിവര്‍ ഈ വിഭാഗത്തില്‍ രണ്ടും, മൂന്നും സ്ഥാനം കരസ്ഥമാക്കി.