പത്തനംതിട്ട: ചക്ക വേവിച്ച് കൊടുക്കാത്തതിനെ തുടർന്ന് അമ്മയെ ക്രൂരമായി മർദ്ദിച്ച മകൻ അറസ്റ്റിൽ. റാന്നി സ്വദേശിയായ സരോജിനിക്ക്(65) നേരെയായിരുന്നു മകൻ വിജേഷിന്റെ(36) ആക്രമണം. സരോജിനിയുടെ ഇരുകൈകളും വിജേഷ് തല്ലിയൊടിച്ചു. ഇവരുടെ തലയ്ക്കും നടുവിനും സാരമായി പരിക്കേറ്റിട്ടുണ്ടെന്നാണ് ലഭിക്കുന്ന വിവരം.
സരോജിനിയെ കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റിയിട്ടുണ്ട്. ഇന്ന് രാവിലെയാണ് സംഭവം. ചക്ക വേവിച്ച് കൊടുക്കാത്തതിന്റെ പേരിലാണ് വിജേഷ് അമ്മയെ ആഞ്ഞിലി കമ്പുപയോഗിച്ച് അടിച്ചതും മർദ്ദിച്ചതുമെന്നാണ് പോലീസ് പറയുന്നത്. മദ്യ ലഹരിയിലായിരുന്ന വിജേഷ് ബന്ധുവീട്ടിൽ നിന്നും ചക്കയുമായാണ് വീട്ടിലെത്തിയത്. ഉടൻ തന്നെ ചക്ക വേവിച്ച് നൽകണമെന്ന് വിജേഷ് ആവശ്യപ്പെട്ടു.
പുറത്ത് പുല്ലുവെട്ടിക്കൊണ്ടിരുന്ന സരോജിനി ഇപ്പോൾ ചക്ക വെട്ടാൻ പറ്റില്ലെന്ന് പറഞ്ഞു. ദേഷ്യത്തിൽ പു റത്തുപോയി വീണ്ടും മദ്യപിച്ചെത്തിയ വിജേഷ് സരോജിനിയെ ക്രൂരമായി മർദ്ദിക്കുകയായിരുന്നു. സരോജിനിയുടെ കരച്ചിൽ കേട്ടെത്തിയ നാട്ടുകാരാണ് ആശുപത്രിയിൽ എത്തിച്ചത്. സ്ഥിരമായി മദ്യപിച്ചെത്തി വിജേഷ് പ്രശ്നം ഉണ്ടാക്കാറുണ്ടെന്ന് നാട്ടുകാർ പറയുന്നു.
