പോത്തന്‍കോട്(തിരുവനന്തപുരം): മഞ്ഞമലയില്‍ 36 ദിവസം പ്രായമുള്ള കുഞ്ഞിനെ കിണറ്റില്‍ വലിച്ചെറിഞ്ഞ് കൊലപ്പെടുത്തി. അമ്മ സുരിത അറസ്റ്റില്‍. പോത്തന്‍കോട് മഞ്ഞമല സജി-സുരിത ദമ്പതികളുടെ രണ്ടാമത്തെ കുഞ്ഞിനെയാണ് കൊലപ്പെടുത്തിയത്. സാമ്പത്തികമായി ബുദ്ധിമുട്ട് അനുഭവിക്കുന്നതിനാല്‍ വളര്‍ത്താന്‍ നിവൃത്തിയില്ലാതെ കുഞ്ഞിനെ കൊല്ലുകയായിരുന്നുവെന്ന് സുരിത സമ്മതിച്ചുവെന്ന് പോലീസ് പറഞ്ഞു. കുഞ്ഞിന്റെ നൂലുകെട്ട് പോലും നടത്താന്‍ പണമില്ലായിരുന്നു. അതിനാല്‍ കൊല്ലാന്‍ തീരുമാനിക്കുകയായിരുന്നുവെന്നാണ് സുരിത പോലീസിനോട് പറഞ്ഞത്.
ബുധനാഴ്ച പുലര്‍ച്ചെയാണ് കുഞ്ഞിന്റെ മൃതദേഹം കിണറ്റില്‍ കണ്ടെത്തിയത്. അമ്മയുടെ അടുത്ത് കിടന്നുറങ്ങിയ കുഞ്ഞിനെ കാണാനില്ലെന്ന വിവരമാണ് ആദ്യം പോലീസിന് ലഭിച്ചത്. അമ്മയെ ചോദ്യം ചെയ്തതോടെയാണ് കുറ്റകൃത്യം തെളിഞ്ഞത്.
പ്രസവത്തിന് ശേഷം കുഞ്ഞുമായി സുരിത മഞ്ഞമലയിലെ വീട്ടിലുണ്ടായിരുന്നു. ഭര്‍ത്താവ് സജി പണിമൂലയിലുള്ള വീട്ടിലായിരുന്നു. രാത്രി രണ്ട് മണിയോടെ സുരിതയുടെ ബഹളം കേട്ടാണ് വീട്ടിലുണ്ടായിരുന്ന അമ്മയും സഹോദരിയും ഉണര്‍ന്നത്. കുഞ്ഞിനെ കാണാനില്ലെന്ന വിവരം അറിഞ്ഞ് സുരിതയുടെ സഹോദരിയാണ് സജിയെയും പോത്തന്‍കോട് പോലീസിലും വിവരം അറിയിച്ചത്. വീടിന്റെ പിന്‍വാതില്‍ തുറന്നു കിടക്കുകയായിരുന്നു. സുരിതയും അമ്മയും സഹോദരിയും രണ്ടു കുട്ടികളുമായിരുന്നു വീട്ടിലുണ്ടായിരുന്നത്. നാട്ടുകാരും പോലീസും പരിശോധന നടത്തിയപ്പോള്‍ കുഞ്ഞിനെ പൊതിഞ്ഞിരുന്ന ടവല്‍ കിണറ്റിന്‍കരയില്‍ കണ്ടു. തുടര്‍ന്ന് കഴക്കൂട്ടം ഫയര്‍ഫോഴ്‌സ് സ്ഥലത്തെത്തി കിണറ്റില്‍ പരിശോധിച്ചപ്പോഴാണ് മൃതദേഹം കിട്ടിയത്. വീട്ടിനുള്ളില്‍ ആരെങ്കിലും കയറി കുഞ്ഞിനെ എടുത്ത് കിണറ്റിലിട്ട് അപായപ്പെടുത്തിയതാമെന്നായിരുന്നു ആദ്യ സംശയം. പക്ഷെ സാഹചര്യ തെളിവുകളുടെ അടിസ്ഥാനത്തിലാണ് പോത്തന്‍കോട് പോലീസ് സുരിതയെ കസ്റ്റഡിലെടുത്തത്. സജിയുടെയും സുരിതയുടെയും മൂത്തമകന് അഞ്ചുവയസ് പ്രായമുണ്ട്.
