എരുമേലി: ശബരിമല തീര്‍ത്ഥാടകരുടെ വാഹനങ്ങള്‍ കടത്തി വിടാത്തതുമായി ബന്ധപ്പെട്ട് എരുമേലിയില്‍ തീര്‍ത്ഥാടകരും പോലീസും തമ്മില്‍ തര്‍ക്കം. രാവിലെ മുതല്‍ ശബരിമലയ്‌ക്കുള്ള തീര്‍ത്ഥാടക വാഹനങ്ങള്‍ പാര്‍ക്കിങ് മൈതാനങ്ങളില്‍ പോലീസ് തടഞ്ഞിരുന്നു. മണിക്കൂറുകളോളം വാഹനം തടഞ്ഞുവെച്ചതിനെ തുടര്‍ന്നാണ് തീര്‍ത്ഥാകര്‍ പ്രതിഷേധവുമായി എത്തിയത്.
നിലയ്‌ക്കലില്‍ തിരക്ക് വര്‍ധിച്ചതിനെ തുടര്‍ന്ന് നിയന്ത്രണം ഏര്‍പ്പെടുത്താന്‍ അധികൃതരുടെ നിര്‍ദ്ദേശം പാലിച്ചാണ് പോലീസ് വാഹനങ്ങള്‍ തടഞ്ഞത്. ഇതിനിടെ കേരള റജിസ്‌ട്രേഷനുള്ള ശബരിമല വാഹനങ്ങള്‍ പോകാന്‍ അനുവദിച്ചെന്നു പറഞ്ഞ് ഇതര സംസ്ഥാനങ്ങളില്‍നിന്ന് എത്തിയ തീര്‍ത്ഥാടകര്‍ കേരള രജിസ്‌ട്രേഷന്‍ വാഹനങ്ങള്‍ തടയുകയായിരുന്നു.
കൂടാതെ തീര്‍ത്ഥാടക വഹനങ്ങള്‍ തടഞ്ഞുവെച്ചിരിക്കുന്നതിനാല്‍ ഗതാഗത തടസമുണ്ടായതില്‍ പ്രദേശ വാസികളും പോലീസിനെതിരെ രംഗത്ത് എത്തി. പ്രതിഷേധത്തെ തുടര്‍ന്ന് ശബരിമലയിലക്കുള്ള വാഹനങ്ങള്‍ തടഞ്ഞുവെച്ചിരിക്കുകയാണെങ്കിലും മറ്റു വാഹനങ്ങള്‍ റോഡിന് ഒരു വശത്തുകൂടി കടത്തി വിടുന്നുണ്ട്.
അതിനിടെ വാഹനങ്ങള്‍ തടഞ്ഞ പൊലീസ് നടപടിയെ ചോദ്യം ചെയ്ത ദേവസ്വം ബോര്‍ഡ് അംഗം അജികുമാറിന്റെ നടപടിക്കെതിരെ പത്തനംതിട്ട എസ്പി രംഗത്തെത്തി. സംഭവത്തില്‍ എസ്പി ദേവസ്വം ബോര്‍ഡ് പ്രസിഡന്റിനെ പ്രതിഷേധം അറിയിച്ചിട്ടുണ്ട്.
