മാറനല്ലൂര്‍: മുഖ്യമന്ത്രിയെ വരവേല്‍ക്കാന്‍ ‘ഐസുകട്ടയില്‍ പെയിന്റടി’ യെന്ന് നാട്ടുകാര്‍. കാട്ടാക്കട മണ്ഡലത്തില്‍ എത്തുന്ന നവകേരള സദസ്സിന് മുഖ്യമന്ത്രിയെ സ്വീകരിക്കാന്‍ ഒരുക്കങ്ങള്‍ തകൃതിയായി നടക്കുമ്പോള്‍ പെരുമഴയത്ത് റോഡ് ടാറിംഗ് പണികളും പുരോഗമിക്കുന്നു.
കാട്ടാക്കട മുതല്‍ നെയ്യാര്‍ഡാം വരെ പൊട്ടിപ്പൊളിഞ്ഞ റോഡ് നവീകരണം കാലങ്ങളായി മുടങ്ങിയ നിലയിലായിരുന്നു. മുഖ്യമന്ത്രി വരുന്നതോടെ കാട്ടാക്കട പട്ടണത്തിന് റോഡിലെ കുഴികളില്‍ നിന്നും മോക്ഷം ലഭിക്കും എന്നാണ് കരുതിയത്. 22 ന് മുമ്പ് പണി പൂര്‍ത്തീകരിക്കാന്‍ മഴ പോലും വകവയ്‌ക്കാതെയാണ് ടാറിംഗ്. മുഖ്യമന്ത്രി വന്നുപോകുന്നതോടെ റോഡിന്റെ സ്ഥിതി വീണ്ടും പഴയ നിലയിലാവും എന്ന സ്ഥിതിയാണ്.
ഇന്നലെ നിരത്തിലിറങ്ങിയ യാത്രക്കാരും നാട്ടുകാരും അതിശയത്തോടെയാണ് വെള്ളത്തിന് പുറത്തുകൂടിയുള്ള ടാറിംഗ് കണ്ടത്. പലരും പ്രതികരിച്ചു, പലരും പരിഹസിച്ചു. എന്തായാലും നവകേരള സദസ് കഴിഞ്ഞും കാട്ടാക്കട കടക്കാന്‍ കഠിനശ്രമം തുടരണമെന്ന് വ്യക്തം.
