അഹമ്മദാബാദ്: ക്രിക്കറ്റ് ലോകകപ്പ് ഫൈനലിന് പിന്നാലെ ഭാരത ക്രിക്കറ്റ് ടീം ഡ്രസിങ് റൂം സന്ദര്‍ശിക്കുന്ന പ്രധാനമന്ത്രി നരേന്ദ്ര മോദിയുടെ ചിത്രങ്ങളും വീഡിയോകളും വൈറലായി. പല താരങ്ങളും പ്രധാനമന്ത്രി ക്യാമ്പിലെത്തിയ ചിത്രം സ്വന്തം എക്‌സ് അക്കൗണ്ടില്‍ പോസ്റ്റ് ചെയ്തു.
പ്രധാനമന്ത്രി ക്യാമ്പിലേക്കെത്തുന്നത് മുതല്‍ ഓരോ താരങ്ങള്‍ക്കരികിലും ചെന്ന് ആശ്വസിപ്പിക്കുന്ന ഫുള്‍ വീഡിയ എക്‌സിലുണ്ട്. ഇത് നിരവധി തവണയാണ് റീട്വീറ്റ് ചെയ്യപ്പെട്ടുകൊണ്ടിരിക്കുന്നത്. കൂടാതെ താരങ്ങളില്‍ പലരും സ്വന്തം നിലയ്‌ക്ക് പ്രധാനമന്ത്രിക്കൊപ്പമുള്ള ചിത്രം പോസ്റ്റ് ചെയ്തതും നിരവധി പേര്‍ റീട്വീറ്റ് ചെയ്യുകും ഒപ്പം ലൈക്കും കമന്റും നേടിയെടുക്കുകയും ചെയ്തു.
ഭാരത നായകന്‍ രോഹിത് ശര്‍മ്മയെയും വിരാട് കോഹ്‌ലിയെയും ആശ്വസിപ്പിക്കുന്ന നരേന്ദ്ര മോദി ടീമിന്റെ പ്രധാന പരിശീലകന്‍ രാഹുല്‍ ദ്രാവിഡിനെ അഭിനന്ദിച്ചു.
രവീന്ദ്ര ജഡേജയോട് ഗുജറാത്തി ഭാഷയിലാണ് അദ്ദേഹം സംസാരിച്ചത്. മുഹമ്മദ് ഷമിയെ നെഞ്ചോട് ചേര്‍ത്തുപിടിച്ച് പുറത്ത് തട്ടി ആശ്വസിപ്പിച്ച പ്രധാനമന്ത്രി ജസ്പ്രീത് ബുംറയോടും ഗുജറാത്തി ഭാഷയിലാണ് സംസാരിച്ചത്. ബാക്കി താരങ്ങളെല്ലാവര്‍ക്കും ഹസ്തദാനം നല്‍കിയാണ് അദ്ദേഹം ഡ്രസിങ് റൂമില്‍ നിന്നും മടങ്ങിയത്. താരങ്ങളെ ആശ്വസിപ്പിച്ചശേഷം ടീമിനെ ഒന്നാകെ ദല്‍ഹിയിലേക്ക് ക്ഷണിക്കൂക കൂടി ചെയ്തു.
