ന്യൂദല്ഹി: പ്രധാനമന്ത്രി നരേന്ദ്ര മോദിയെ അവതരിപ്പിക്കുന്ന ചെറുധാന്യങ്ങളെ കുറിച്ചുള്ള ഗാനം ഗ്രാമി അവാര്ഡിന് നാമനിര്ദ്ദേശം ചെയ്യപ്പെട്ടു. മികച്ച ആഗോള സംഗീത പ്രകടന വിഭാഗത്തിലാണ് ഗാനം നാമനിര്ദ്ദേശം ചെയ്യപ്പെട്ടിരിക്കുന്നത്.
ആരോഗ്യ ഗുണങ്ങളും പോഷകസമൃദ്ധമായ ധാന്യങ്ങള് പ്രോത്സാഹിപ്പിക്കുന്നതിനുള്ള സര്ക്കാരിന്റെ ശ്രമങ്ങളും ഗാനം എടുത്തുകാണിക്കുന്നു. ‘അബണ്ടന്സ് ഇന് മില്ലറ്റ്സ്’ എന്ന ഗാനം ഈ വര്ഷം ഐക്യരാഷ്ട്രസഭ പ്രഖ്യാപിച്ച ചെറുധാന്യങ്ങളുടെ അന്താരാഷ്ട്ര വര്ഷത്തെ ആഘോഷിക്കുന്നു. മുംബൈയില് ജനിച്ച ഗായകനും ഗാനരചയിതാവുമായ ഫാല്ഗുനി ഷായും ഭര്ത്താവും ഗായകനുമായ ഗൗരവ് ഷായും ചേര്ന്നാണ് ഈ ഗാനം രചിച്ചിരിക്കുന്നത്.
ഈ വര്ഷം മാര്ച്ചില് ന്യൂദല്ഹിയില് നടന്ന ആഗോള ചെറുധാന്യ (ശ്രീ അന്ന) സമ്മേളനത്തിന്റെ ഉദ്ഘാടന വേളയില് പ്രധാനമന്ത്രി മോദി നടത്തിയ പ്രസംഗത്തിന്റെ ഭാഗങ്ങള് ഗാനത്തിലുണ്ട്. അന്താരാഷ്ട്ര ചെറുധാന്യ വര്ഷം-2023 ആഘോഷിക്കുന്നതിന്റെ ഭാഗമായി ഈ വര്ഷം ജൂണില് ദി അബന്ഡന്സ് ഇന് മില്ലറ്റ്സ് പുറത്തിറങ്ങി.
ഐക്യരാഷ്ട്രസഭയുടെ ഭക്ഷ്യ-കാര്ഷിക സംഘടന ഭരണസമിതിയും യുഎന് പൊതുസഭയും ഇന്ത്യയുടെ നിര്ദ്ദേശത്തെ അംഗീകരിച്ചാണ് 2023 വര്ഷം ‘ചെറുധാന്യങ്ങളുടെ അന്താരാഷ്ട്ര വര്ഷം’ ആയി നിശ്ചയിച്ചത്.
