ദുബായ് എയർഷോ ഒരുങ്ങുന്നു: ഇത്തവണ പങ്കെടുക്കുന്നത് നൂറ്റമ്പതിലധികം വിമാനങ്ങൾ, 95 രാജ്യങ്ങളിൽ നിന്നും1400ലധികം പ്രദർശകർ

ദുബായ്: ദുബായ് എയർഷോയുടെ പതിനെട്ടാമത് പതിപ്പ് നവംബർ 13 ന് ആരംഭിക്കുമെന്ന് ദുബായ് മീഡിയ ഓഫീസ് അറിയിച്ചു. ദുബായ് വേൾഡ് സെന്ററിലെ ദുബായ് എയർഷോ വേദിയിൽ വെച്ചാണ് ഈ വ്യോമപ്രദർശനം സംഘടിപ്പിക്കുന്നത്. 13 മുതൽ നവംബർ 17 വരെയാണ് പതിനെട്ടാമത് ദുബായ് എയർഷോ നടത്തുന്നത്.

ദുബായ് എയർപോർട്ട്സ്, ദുബായ് സിവിൽ ഏവിയേഷൻ അതോറിറ്റി, യുഎഇ പ്രതിരോധ മന്ത്രാലയം, ദുബായ് ഏവിയേഷൻ എൻജിനീയറിങ്ങ് പ്രോജക്ടസ് , യു എഇ സ്പേസ് ഏജൻസി തുടങ്ങിയവരുടെ പിന്തുണയോടെയാണ് ദുബായ് എയർഷോ സംഘടിപ്പിക്കുന്നത്. 180-ൽ പരം വിമാനങ്ങൾ ഇത്തവണത്തെ ദുബായ് എയർഷോയിൽ പങ്കെടുക്കുന്നുണ്ട്.

വ്യോമയാന മേഖലയിൽ ആഗോളതലത്തിൽ തന്നെ പ്രധാനപ്പെട്ട ഒരു എയർഷോ ആണിത്. ഇത്തവണത്തെ ദുബായ് എയർഷോയിൽ 95 രാജ്യങ്ങളിൽ നിന്നുള്ള ആയിരത്തി നാനൂറിലധികം പ്രദർശകർ പങ്കെടുക്കുമെന്ന് ദുബായ് മീഡിയ ഓഫീസ് അറിയിച്ചു.

ഒരു ലക്ഷത്തിലധികം സന്ദർശകരെയാണ് ഈ വർഷത്തെ എയർഷോയിൽ പ്രതീക്ഷിക്കുന്നത്. സന്ദർശകർക്ക് വ്യോമയാന മേഖലയിൽ നിന്നുള്ള അതിനൂതന സാങ്കേതികവിദ്യകൾ, പുത്തൻ ആശയങ്ങൾ മുതലായവ അടുത്തറിയുന്നതിന് ദുബായ് എയർഷോ അവസരമൊരുക്കുന്നു.