തിരുവനന്തപുരം: ഏഷ്യന്‍ ഗെയിംസില്‍ മെഡല്‍ നേടിയിട്ടും. കായികമന്ത്രി അബ്ദുറഹ്മാനോ സംസ്ഥാന സര്‍ക്കാര്‍ പ്രതിനിധികളോ ഒന്നു വിളിച്ചഭിനന്ദിക്കാത്തതിന്റെ വേദനയുമായി ജിന്‍സണ്‍ ജോണ്‍സണ്‍. അഭിനന്ദനം അറിയിച്ച് സർക്കാരിന്റെ ഭാഗത്ത് നിന്നും ആരും വിളിച്ചിട്ടില്ല. അവഗണ നേരിടുന്നത് കൊണ്ടാണ് പല കായികതാരങ്ങളും കേരളം വിടുന്നതെന്നും ജിൻസൺ ജോൺസൺ പറഞ്ഞു.
ഏഷ്യൻ ഗെയിംസ് 1500 മീറ്ററിൽ വെങ്കല മെഡൽ നേട്ടവുമായാണ് ജിൻസൺ ജോൺസൺ കേരളത്തിൽ കഴിഞ്ഞ ദിവസം മടങ്ങിയെത്തിയത്. എന്നാൽ പ്രതീക്ഷിച്ച പിന്തുണ കേരളത്തിൽ നിന്ന് ലഭിച്ചില്ലെന്ന് ജിൻസൺ പറയുന്നു. കഷ്ടപ്പാടിന്റെ പ്രതിഫലമാണ് ഓരോ മെഡലും. അതിനനുസരിച്ചുള്ള അംഗീകാരം സർക്കാരുകൾ നൽകണമെന്നും ജിൻസൺ പറഞ്ഞു.
മറ്റു സംസ്ഥാനങ്ങളിൽ ഏഷ്യന്‍ ഗെയിംസ് മെഡൽ ജേതാക്കൾക്ക് മികച്ച പാരിതോഷികം നൽകുന്നു. എന്നാൽ കേരളത്തിലെ മെഡൽ ജേതാക്കൾക്ക് സർക്കാർ ഇതുവരെ പാരിതോഷികം പ്രഖ്യാപിച്ചിട്ടില്ല.
