തിരുവനന്തപുരം: മുഖ്യമന്ത്രി പിണറായി വിജയനെ വിമര്‍ശിച്ച് ഗവര്‍ണര്‍ ആരിഫ് മുഹമ്മദ് ഖാന്‍. മുഖ്യമന്ത്രി ഗവര്‍ണറെ നേരിട്ട് കണ്ട് ഭരണ കാര്യങ്ങള്‍ വിശദീകരിക്കുന്നില്ലെന്നും രാജ് ഭവനിലേക്ക് വരുന്നില്ലെന്നും അദ്ദേഹം കുറ്റപ്പെടുത്തി.
ഭരണ കാര്യങ്ങള്‍ ഗവര്‍ണറെ നേരിട്ട് അറിയിക്കേണ്ടത് ഭരണഘടനാപരമായ ഉത്തരവാദിത്വമാണ്.നിയമവിരുദ്ധവും സുപ്രീംകോടതി ഉത്തരവുകളെ ചോദ്യം ചെയ്യുന്നതുമായ ബില്ലുകള്‍ ഒപ്പിടാനാവില്ലെന്നും മന്ത്രിമാരും ഉദ്യോഗസ്ഥരും രാജ്ഭവനില്‍ എത്തിയിട്ട് എന്ത് കാര്യമെന്നും ഗവര്‍ണര്‍ പറഞ്ഞു.
സര്‍വകലാശാലകളിലെ വി സി അധികാരം കൈക്കലാക്കാനാണ് സര്‍ക്കാര്‍ ശ്രമമെന്നും പാര്‍ട്ടി തീരുമാനമാണ് മുഖ്യമന്ത്രി നടപ്പാക്കുന്നതെന്നും ഗവര്‍ണര്‍ വിമര്‍ശിച്ചു.
സര്‍ക്കാര്‍ നിഷ്പക്ഷമായല്ല പ്രവര്‍ത്തിക്കുന്നത്. സത്യപ്രതിജ്ഞ ലംഘനമാണ് നടത്തുന്നത്. കരിവണ്ണൂര്‍ സഹകരണ ബാങ്ക് ക്രമക്കേടില്‍ പരാതി ലഭിച്ചാല്‍ വിശദീകരണം തേടുമെന്നും ഗവര്‍ണര്‍ പറഞ്ഞു.
ബില്ലുകള്‍ ഒപ്പിടാതെ ഗവര്‍ണര്‍ കാലതാമസം വരുത്തുന്നത് പാര്‍ലമെന്ററി ജനാധിപത്യത്തിന്റെ അന്തസത്തയ്‌ക്ക് നിരക്കുന്നതല്ലെന്ന് മുഖ്യമന്ത്രി വിമര്‍ശിച്ചിരുന്നു.ഗവര്‍ണറെ സന്ദര്‍ശിച്ച് മന്ത്രിമാരടക്കം ബില്ലുകളില്‍ വിശദീകരണം നല്‍കിയതാണെന്നും എന്നിട്ടും തീരുമാനമായില്ലെന്നും പിണറായി വിജയന്‍ കുറ്റപ്പെടുത്തിയിരുന്നു.
