ഹാങ്ഷൗ: ചൈനയിലെ ഹാങ്ഷൗവില് നടക്കുന്ന ഏഷ്യന് ഗെയിംസ് പുരുഷ ടേബിള് ടെന്നീസില് യെമനെതിരെ 3-0ത്തിന് ഇന്ത്യ വിജയിച്ചു. ശരത് കമല്, ജി സത്യന്, ഹര്മീത് ദേശായി എന്നിവര് സിംഗിള്സ് മത്സരങ്ങള് ജയിച്ചു കയറുകയായിരുന്നു.അടുത്തതായി സിംഗപ്പൂരിനെയാണ് ഇന്ത്യ നേരിടുന്നത്.
ഇന്ത്യയുടെ വനിതാ ടീമും സിംഗപ്പൂരിനെതിരെ ഇന്ന് മത്സരിക്കുന്നുണ്ട്. വോളിബോളില്, ചൈനീസ് തായ്പേയ്ക്കെതിരായ വിജയത്തിന്റെ കുതിപ്പ് തുടരാനാണ് ഇന്ത്യന് പുരുഷ ടീം ലക്ഷ്യമിടുന്നത്. ബുധനാഴ്ച നടന്ന മത്സരത്തില് ഉയര്ന്ന റാങ്കുകാരായ ദക്ഷിണ കൊറിയയെ 3-2 ന് ഇന്ത്യ പരാജയപ്പെടുത്തി. ചൊവ്വാഴ്ച നടന്ന പൂള് സി മത്സരത്തില് കംബോഡിയയെ പരാജയപ്പെടുത്തിയാണ് ഇന്ത്യ തുടങ്ങിയത്.
രണ്ട് കളികളില് രണ്ട് ജയവും അഞ്ച് പോയിന്റുമായി പൂള് സി പട്ടികയില് ഒന്നാം സ്ഥാനത്താണ് ഇന്ത്യ.
ഏഷ്യന് ഗെയിംസിന്റെ 19-ാം പതിപ്പ് നാളെ ഔദ്യോഗികമായി ആരംഭിക്കും. ചില മത്സരങ്ങള് ഇതിനോടകം ആരംഭിച്ചിട്ടുണ്ട്.
