ഇറ്റാനഗര്: ഏഷ്യന് ഗെയിംസിലെ വുഷു മത്സരത്തില് പങ്കെടുക്കാന് അരുണാചല് പ്രദേശില് നിന്നുള്ള മൂന്നു കളിക്കാര്ക്ക് അനുമതി നിഷേധിച്ചതില് ചൈനയെ പ്രതിഷേധമറിയിച്ച് ഇന്ത്യ. കേന്ദ്ര കായിക മന്ത്രി അനുരാഗ് താക്കൂര് ചൈന സന്ദര്ശനവും റദ്ദാക്കി.
ഇന്ത്യന് പൗരന്മാരെ താമസിക്കുന്ന പ്രദേശത്തിന്റെ അടിസ്ഥാനത്തില് വ്യത്യസ്തമായി പരിഗണിക്കുന്നത് ഇന്ത്യ അംഗീകരിക്കുന്നില്ലെന്നും ചൈനയുടെ പ്രവര്ത്തനങ്ങള് ഏഷ്യന് ഗെയിംസിന്റെ സത്തയെ ലംഘിക്കുന്നതായും മാധ്യമങ്ങളെ അഭിസംബോധന ചെയ്ത് വിദേശകാര്യ മന്ത്രാലയ വക്താവ് അരിന്ദം ബാഗ്ചി പറഞ്ഞു.
” വാസസ്ഥലത്തിന്റെയോ വംശീയതയുടെയോ അടിസ്ഥാനത്തില് ഇന്ത്യന് പൗരന്മാരെ വ്യത്യസ്തമായി പരിഗണിക്കുന്നതിനെ രാജ്യം ശക്തമായി നിരാകരിക്കുന്നു. അരുണാചല് പ്രദേശ് ഇന്ത്യയുടെ അവിഭാജ്യ ഭാഗമാണ്. ഇന്നും, എന്നും അങ്ങനെയായിരിക്കും. ചൈനയുടെ നടപടി ഏഷ്യന് ഗെയിംസിന്റെ സത്തയെയും നിയമങ്ങളെയും ലംഘിക്കുന്നതാണ്. അംഗരാജ്യങ്ങളില് നിന്നുമുളള മത്സരാര്ത്ഥികളോടുള്ള വിവേചനം വ്യക്തമായി നിരോധിക്കുന്ന നിയമത്തിന്റെ ലംഘനമാണ്- വിദേശകാര്യ മന്ത്രാലയ വക്താവ് പറഞ്ഞു.
നെയ്മാന് വാങ്സു, ഒനിലു ടെഗ, മെപുങ് ലാംഗു എന്നീ താരങ്ങള് ഹ്വാംഗ്ഷൂ ഏഷ്യന് ഗെയിംസ് സംഘാടക സമിതിയില് നിന്ന് അവരുടെ അക്രഡിറ്റേഷന് കാര്ഡുകള് സ്വീകരിച്ചു. ഇത് എന്ട്രി വിസയായും പ്രവര്ത്തിക്കുന്നു. എന്നാല്, ബുധനാഴ്ച ഏഷ്യന് ഗെയിംസിനു പോകാനിരിക്കെ യാത്രാരേഖ ഡൗണ്ലോഡ് ചെയ്യാനായില്ല.ബാക്കിയുള്ള 10 വുഷു കളിക്കാര് അത്തരം പ്രശ്നങ്ങളൊന്നും നേരിട്ടില്ല.
ചൈനയുടെ നടപടിയെ അപലപിച്ച് മുന് കായിക മന്ത്രി കിരണ് റിജിജു ട്വിറ്ററില് കുറിച്ചു. ‘ഇത് സ്പോര്ട്സിന്റെ മനോഭാവത്തെയും ഏഷ്യന് ഗെയിംസിന്റെ പെരുമാറ്റത്തെ നിയന്ത്രിക്കുന്ന നിയമങ്ങളെയും ലംഘിക്കുന്നു. അരുണാചല് പ്രദേശ് ഒരു തര്ക്ക പ്രദേശമല്ല.മറിച്ച് ഇന്ത്യയുടെ ഭാഗമാണ്. അരുണാചല് പ്രദേശിലെ മുഴുവന് ജനങ്ങളും ചൈനയുടെ നിയമവിരുദ്ധ അവകാശവാദത്തെ എതിര്ക്കുന്നു.
എന്നാല് കളിക്കാര്ക്ക് വിസ നിഷേധിച്ചിട്ടില്ലെന്നാണ് ചൈനയുടെ വാദം. അത്ലറ്റുകള് വിസ സ്വീകരിക്കാത്തതാണ് കാരണമെന്ന് ഏഷ്യന് ഒളിമ്പിക് ധാര്മ്മിക സമിതി അധ്യക്ഷന് വെയ് ജിഷോംഗ് പറഞ്ഞു.
