ചണ്ഡീഗഢ്: ഹരിയാനയില്‍ അക്രമം വിതയ്‌ക്കാന്‍ ആഗ്രഹിക്കുന്ന ആരുടെയോ ഗൂഢാലോചനയുടെ ഫലമാണ് നൂഹില്‍ ഹിന്ദുയാത്രയ്‌ക്ക നേരെ നടന്ന കല്ലേറെന്ന് ഹരിയാന ആഭ്യന്തരമന്ത്രി അനില്‍ വിജ്.
എല്ലാവര്‍ഷവും നടക്കുന്നതുപോലെ തന്നെ ഈ വര്‍ഷവും ബ്രിജ് മണ്ഡല്‍ ജലാഭിഷേക യാത്ര നടന്നു. ഈ യാത്ര നടക്കുന്നതിനിടയിലാണ് കല്ലേറുണ്ടായത്. ആരോ നടത്തിയ ഗൂഡാലോചനയുടെ ഭാഗമായി യാത്രയെ ആക്രമിച്ചു. വലിയൊരു ഗൂഡാലോചന പോലെയാണ് സംഭവങ്ങള്‍ നടന്നത്.
“അക്രമത്തിന്റെ ഗൗരവമുള്ള സ്വഭാവം, ഒരേ സമയം നിരവധി ഭാഗങ്ങളില്‍ അക്രമം നടന്നത്, എറിയാനുള്ള കല്ലുകള്‍ ശേഖരിച്ച് വെച്ച രീതി, ആയുധങ്ങള്‍ ആളുകള്‍ക്ക് നേരെ വീശിയ രീതി, തോക്കുകള്‍ ഉപയോഗിച്ച് വെടിവെച്ച രീതി…ഇതെല്ലാം വെച്ച് നോക്കുമ്പോള്‍ പെട്ടെന്ന് പൊട്ടിപ്പുറപ്പെട്ട ഒരു അക്രമസംഭവമായി അതിനെ തോന്നുന്നില്ല.”- അനില്‍ വിജ് പറഞ്ഞു.
” ഇരുസമുദായങ്ങളും സമാധാനത്തോടെ ജീവിക്കുന്ന സ്ഥലമാണ് നൂഹ്. ഈ സമാധാനം തകര്‍ക്കാന്‍ ആരോ ഗൂഢാലോചന നടത്തിയതിന്റെ ഭാഗമാണ് അക്രമം. “- അനില്‍ വിജ് വിശദീകരിച്ചു.
