ഹെഡിങ്ലി: ഓസ്ട്രേലിയക്കെതിരായ ആഷസ് പരമ്പരയിലെ മൂന്നാം ടെസ്റ്റ് ഇന്ന് മുതല്. ആദ്യ രണ്ട് ടെസ്റ്റുകളും തോറ്റ ഇംഗ്ലണ്ട് അഞ്ച് ടെസ്റ്റുകളുടെ പരമ്പരയില് 2-0ന് പിന്നിലാണ്. അതുകൊണ്ടുതന്നെ ഈ ടെസ്റ്റ് ഇംഗ്ലണ്ടിന് നിര്ണായകമാണ്. ഇതിലും പരാജയപ്പെട്ടാല് ആഷസ് കിരീടം ഓസ്ട്രേലിയ നിലനിര്ത്തും. ആദ്യ രണ്ട് ടെസ്റ്റുകളിലും വിജയം നേടിയ ഓസ്ട്രേലിയ തികഞ്ഞ ആത്മവിശ്വാസത്തിലാണ്. ഈ ടെസ്റ്റും ജയിച്ച് ആഷസ് സ്വന്തമാക്കുകയെന്ന ലക്ഷ്യത്തോടെയാകും കംഗാരുക്കള് ഇന്ന് മൈതാനത്തിറിങ്ങുക.
അതേസമയം ആഷസ് പരമ്പരയിലെ മൂന്നാം ക്രിക്കറ്റ് ടെസ്റ്റിനുള്ള ഇംഗ്ലണ്ട് ഇലവനെ പ്രഖ്യാപിച്ചു. ലോര്ഡ്സില് രണ്ടാം ടെസ്റ്റ് തോറ്റ ടീമില് മൂന്ന് മാറ്റങ്ങളുമായാണ് ഇംഗ്ലണ്ട് ടീം പ്രഖ്യാപി
ച്ചത്. ഒലി പോപ്പ് പരിക്കേറ്റ് പുറത്തായതിനാല് പരമ്പരയിലെ ശേഷിക്കുന്ന മത്സരങ്ങളില് കളിക്കില്ല. പോപ്പിന് പകരം ഹാരി ബ്രൂക്ക് ആകും ഇന്ന് ഹെഡിങ്ലിയില് തുടങ്ങുന്ന മൂന്നാം ടെസ്റ്റില് വണ് ഡൗണായി ക്രീസിലെത്തുക.
ആദ്യ രണ്ടും ടെസ്റ്റില് കളിച്ച പേസര് ജെയിംസ് ആന്ഡേഴ്സണും കഴിഞ്ഞ ടെസ്റ്റില് അരങ്ങേറിയ ജോഷ് ടങ്ങിനും മൂന്നാം ടെസ്റ്റില് വിശ്രമം അനുവദിച്ചു. രണ്ടാം ടെസ്റ്റില് പരിക്കുമൂലം കളിക്കാതിരുന്ന മൊയീന് അലി തിരിച്ചെത്തിയപ്പോള് പേസര്മാരായ ക്രിസ് വോക്സും മാര്ക്ക് വുഡും അന്തിമ ഇലവനിലെത്തി. ഒരു ടെസ്റ്റ് മാത്രം കളിച്ച ടങ് ലോര്ഡ്സില് തിളങ്ങിയിട്ടും വിശ്രമം അനുവദിച്ച തീരുമാനം ആരാധകരെ അമ്പരപ്പിച്ചു. ആദ്യ രണ്ട് ടെസ്റ്റിലും തിളങ്ങാനാവാതിരുന്ന ആന്ഡേഴ്സണ് വിശ്രമം അനുവദിച്ചിരിക്കുകയാണെങ്കിലും ശേഷിക്കുന്ന ടെസ്റ്റിലും കളിപ്പിക്കാനുള്ള സാധ്യത മങ്ങി.
ഉസ്മാന് ഖവാജയും സ്റ്റീവ് സ്മിത്തും ഡേവിഡ് വാര്ണറും ട്രവിസ് ഹെഡുമടങ്ങുന്ന ബാറ്റര്മാരിലാണ് കഴിഞ്ഞ മത്സരങ്ങളിലെപ്പോലെ ഇത്തവണയും ഓസീസിന്റെ പ്രതീക്ഷ. രണ്ട് ടെസ്റ്റിലെ നാല് ഇന്നിങ്സുകളില് നിന്നായി 300 റണ്സ് നേടിയ ഖവാജയാണ് നിലവില് ടോപ് സ്കോറര്. ഒരു സെഞ്ചുറിയും രണ്ട് അര്ധസെഞ്ചുറിയുമടക്കമാണ് ഖവാജ 300 റണ്സ് അടിച്ചെടുത്തത്. പാറ്റ് കമ്മിന്സും നഥാന് ലിയോണും ഹെയ്സല്വുഡുമടങ്ങുന്ന ബൗളര്മാരും മികച്ച ഫോമിലാണെന്നത് കംഗാരുക്കളുടെ ആത്മവിശ്വാസം ഉയര്ത്തുന്നു.
ലോര്ഡ്സ് ടെസ്റ്റില് ഇംഗ്ലണ്ട് വിക്കറ്റ് കീപ്പര് ബാറ്റര് ജോണി ബെയര്സ്റ്റോയെ ഓസീസ് കീപ്പര് അലക്സ് ക്യാരി റണ്ണൗട്ടാക്കിയത് വിവാദമായതിനാല് മൂന്നാം ടെസ്റ്റിന് അധിക സുരക്ഷ വേണമെന്ന് ഓസ്ട്രേലിയ ആവശ്യപ്പെട്ടിട്ടുണ്ട്.
ബെയര്സ്റ്റോയുടെ റണ്ണൗട്ടിനെ വിമര്ശിച്ച് ബ്രിട്ടീഷ് പ്രധാനമന്ത്രി ഋഷി സുനകും ന്യായീകരിച്ച് ഓസ്ട്രേലിയന് പ്രധാനമന്ത്രി ആന്റണി ആല്ബനീസും രംഗത്തുവന്നതോടെ മൂന്നാം ടെസ്റ്റിന് പ്രാധാന്യമേറുകയും ചെയ്തു. മാര്ക്ക് വുഡും ക്രിസ് വോക്സും എത്തുന്നതോടെ മൂന്നാം ടെസ്റ്റിലും ഇംഗ്ലണ്ട് നാല് പേസര്മാരുമായാണ് ഇറങ്ങുക. മൊയിന് അലി മാത്രമാകും ഏക സ്പിന്നര്.
ആഷസ് പരമ്പരയിലെ മൂന്നാം ടെസ്റ്റിനുള്ള ഇംഗ്ലണ്ട് ഇലവന്: സാക്ക് ക്രാളി, ബെന് ഡക്കറ്റ്, ഹാരി ബ്രൂക്ക്, ജോ റൂട്ട്, ജോണി ബെയര്സ്റ്റോ (വിക്കറ്റ് കീപ്പര്), ബെന് സ്റ്റോക്സ് (ക്യാപ്റ്റന്), മോയിന് അലി, ക്രിസ് വോക്സ്, മാര്ക്ക് വുഡ്, ഒല്ലി റോബിന്സണ്, സ്റ്റുവര്ട്ട് ബ്രോഡ്.
