ലണ്ടന്: ഐസിസി വനിതാ ട്വന്റി20 ലോകകപ്പിന് നാളെ തുടക്കം. ഇംഗ്ലണ്ടിലും വെയ്ല്സിലുമായി നടക്കുന്ന ലോകകപ്പില് 12 ടീമുകളാണ് കിരീടത്തിനായി ഇറങ്ങുന്നത്. വനിതാ കുട്ടിക്രിക്കറ്റ് ലോക പോരിന്റെ പത്താം പതിപ്പാണിത്. നാളെ രാത്രി 11ന് ബിര്മിങ്ങാമില് നടക്കുന്ന ഉദ്ഘാടന മത്സരത്തില് ആതിഥേയരായ ഇംഗ്ലണ്ട് ശ്രീലങ്കയെ നേരിടും. അടുത്ത മാസം അഞ്ചിന് ലോര്ഡ്സില് ഫൈനല്.
ഭാരതത്തിന്റെ ആദ്യ മത്സരം ഞായറാഴ്ച്ച രാത്രി ഏഴിന് പാകിസ്ഥാനെതിരെയാണ്. ആറ് വീതം ടീമുകളുള്ള രണ്ട് ഗ്രൂപ്പുകളായി തിരിഞ്ഞാണ് പ്രാഥമിക റൗണ്ട്. ഭാരതം, പാകിസ്ഥാന് എന്നിവയ്ക്ക് പുറമെ ഓസ്ട്രേലിയ, ദക്ഷിണാഫ്രിക്ക, ബംഗ്ലാദേശ്, നെതര്ലന്ഡ്സ് ടീമുകളാണ് ഗ്രൂപ്പ് എയില് ഉള്പ്പെടുന്ന മറ്റ് ടീമുകള്. ആതിഥേയരായ ഇംഗ്ലണ്ടിന് പുറമെ ന്യൂസിലന്ഡ്, വെസ്റ്റിന്ഡീസ്, ശ്രീലങ്ക, സ്കോട്ട്ലന്ഡ്, അയര്ലന്ഡ് ടീമുള് ഉള്ളതാണ് ഗ്രൂപ്പ് ബി.
ഓരോ ഗ്രൂപ്പിലെയും ടീമുകള് പരസ്പരം പോരടിക്കുന്ന റൗണ്ട് റോബിന് മത്സരങ്ങള്ക്കൊടുവില് പോയിന്റ് നിലയില് മുന്നിലെത്തുന്ന രണ്ട് വീതം ടീമുകള് സെമിയില് പ്രവേശിക്കും. ഗ്രൂപ്പ് എയിലെ ഒന്നാം സ്ഥാനക്കാരും ഗ്രൂപ്പ് ബിയിലെ രണ്ടാം സ്ഥാനക്കാരുമായിരിക്കും സെമിയില് ഏറ്റുമുട്ടുക. മറ്റൊരു സെമിയില് ഗ്രൂപ്പ് ബി ഒന്നാം സ്ഥാനക്കാരും ഗ്രൂപ്പ് എ രണ്ടാം സ്ഥാനക്കാരും തമ്മില് പോരടിക്കും. 28ന് പ്രാഥമിക റൗണ്ട് പൂര്ത്തിയാകും. 30ന് ആദ്യ സെമി ജൂലൈ രണ്ടിന് രണ്ടാം സെമി.
ന്യൂസിലന്ഡ് ആണ് നിലവിലെ ജേതാക്കള്. 2024ല് നടന്ന കഴിഞ്ഞ ലോകകപ്പ് ഫൈനലില് ദക്ഷിണാഫ്രിക്കയെ 32 റണ്സിന് പരാജയപ്പെടുത്തിയാണ് ന്യൂസിലന്ഡ് കന്നിക്കിരീടനേട്ടം ആഘോഷിച്ചത്.
