‘ഒടുക്ക’ത്തെ ഗ്രൂപ്പില്‍ ക്രൊയേഷ്യയും ഇംഗ്ലണ്ടും !

മുന്‍ ലോക ജേതാക്കളായ ഇംഗ്ലണ്ടും കരുത്തരായ ക്രൊയേഷ്യയും ആഫ്രിക്കന്‍ ടീം ഘാന, തെക്കേ അമേരിക്കയില്‍ നിന്നുള്ള പാനമ എന്നിവര്‍ അണിനിരക്കുന്ന ഗ്രൂപ്പ് ആണ് എല്‍. അറുപത് വര്‍ഷത്തെ കാത്തിരിപ്പിന് അറുതി വരുത്താനാണ് തോമസ് ടുഷേലിന് കീഴില്‍ ഇംഗ്ലീഷ് പട വടക്കേ അമേരിക്കയിലേക്ക് യാത്ര തിരിച്ചിരിക്കുന്നത്. ലൂക്കാ മോഡ്രിച്ചിന്റെ നിഴലില്‍ ക്രൊയേഷ്യന്‍ ടീം അവരുടെ മികച്ച നിലവാരവുമായാണ് ഇത്തവണയും എത്തുന്നത്. കഴിഞ്ഞ രണ്ട് ലോകകപ്പുകളിലും മികച്ച ഗ്രാഫോടെ ഫിനിഷ് ചെയ്ത ടീമാണ്. അട്ടിമറിക്ക് അധികം പിന്നിലല്ലെന്ന് തെളിയിച്ച ടീം ആണ് ഘാന. പിന്നെയുള്ളത് ലാറ്റിനമേരിക്കന്‍ ടൂര്‍ണമെന്റുകളില്‍ കരുത്തറിയിച്ചിട്ടുള്ള പാനമയാണ്. വമ്പന്‍മാരെ തോല്‍പ്പിച്ചാല്‍ പോലും ഇത്തവണ മികച്ച മൂന്നാം സ്ഥാനക്കാര്‍ക്ക് അവസരമുള്ളതിനാല്‍ ആദ്യ കടമ്പ കടക്കാനാകുമെന്ന് പ്രതീക്ഷ ഏറ്റവും കൂടുതലുള്ള ഗ്രൂപ്പ് ഇതായിരിക്കും.

ഇംഗ്ലണ്ട്
ഒരേയൊരു തവണ മാത്രമാണ് ഇംഗ്ലണ്ടില്‍ ലോകകപ്പ് ഫുട്‌ബോള്‍ നടന്നിട്ടുള്ളത്-1966ല്‍. അക്കൊല്ലം മാത്രമാണ് ഇംഗ്ലണ്ട് ഫുട്‌ബോള്‍ ടീം ലോക കിരീടം നേടിയിട്ടുള്ളത്. 1950ലെ ബ്രസീല്‍ ലോകകപ്പ് മുതലാണ് ഇംഗ്ലണ്ട് കളിച്ചു തുടങ്ങിയത്. 1990ലും 2018ലും സെമി വരെ മുന്നേറിയതാണ് ഇംഗ്ലണ്ട് ലോകകപ്പ് ഫുട്‌ബോളില്‍ കൈവരിച്ച വലിയ നേട്ടങ്ങള്‍. 1958, 2014 ലോകകപ്പുകളില്‍ പ്രാഥമിക റൗണ്ടില്‍ തന്നെ പുറത്തായി. 1974, 1978, 1994 ലോകകപ്പുകളില്‍ യോഗ്യതനേടാനായില്ല.

ക്രൊയേഷ്യ
1991ല്‍ രാജ്യം യുഗോസ്ലാവ്യയില്‍ നിന്ന് സ്വതന്ത്രമാക്കപ്പെട്ടു. 1998ലെ ഫ്രഞ്ച് ലോകകപ്പില്‍ ആദ്യ അവസരം. അക്കൊല്ലം മൂന്നാം സ്ഥാനക്കാരായി മികവ് തെളിയിച്ചാണ് ക്രൊട്ടുകള്‍ ഫ്രാന്‍സില്‍ നിന്ന് മടങ്ങിയത്. തുടര്‍ന്നുള്ള ലോകകപ്പുകളില്‍ ആ വീര്യത്തിന് വലിയ തോതില്‍ മങ്ങലേറ്റു. 2010ല്‍ ദക്ഷിണാഫ്രിക്കയിലേക്ക് യോഗ്യത നേടാന്‍ പോലും കഴിഞ്ഞില്ല. പിന്നീട് ലൂക്കാ മോഡ്രിഡ്, ഇവാന്‍ പെരിസിച്ച്, ഇവാന്‍ റാക്കിട്ടിച്ച് എന്നിവരടങ്ങിയ സുവര്‍ണ നിരയിലൂടെ 2018ല്‍ വലിയ മുന്നേറ്റം നടത്തി. ഫ്രാന്‍സിനെതിരെ ഫൈനലില്‍ മികച്ച പോരാട്ടം കാഴ്‌ച്ചവച്ച് കീഴടങ്ങി റണ്ണറപ്പുകളായി. കഴിഞ്ഞ തവണ ഖത്തര്‍ ലോകകപ്പിലും മികച്ച നിലവാരം പുലര്‍ത്തി. മൂന്നാം സ്ഥാനക്കാരായണ് അവിടെ നിന്ന് മടങ്ങിയത്.

ഘാന
2006 ജര്‍മന്‍ ലോകകപ്പ് മുതലാണ് ഘാന കളിക്കാന്‍ തുടങ്ങിയത്. ആഫ്രിക്കന്‍ വന്‍കരയില്‍ നടന്ന തൊട്ടടുത്ത ലോകകപ്പിന്റെ ക്വാര്‍ട്ടറിലെത്തിയതാണ് ഏറ്റവും വലിയ മുന്നേറ്റം. 2018ലെ റഷ്യന്‍ ലോകകപ്പില്‍ യോഗ്യത നേടിയില്ല. കഴിഞ്ഞ തവണ ഗ്രൂപ്പ് സ്റ്റേജില്‍ പരാജയപ്പെട്ടു.

പാനമ
രണ്ടാം തവണയാണ് പാനമ ലോകകപ്പ് യോഗ്യത നേടുന്നത്. ആദ്യമായി കളിച്ചത് 2018 റഷ്യന്‍ ലോകകപ്പിലാണ്.