കൊച്ചി: കുന്നത്തു നാട് എംഎല്എ വി. ശ്രീനിജന് അപകീര്ത്തി കേസില് മുന്കൂര് ജാമ്യാപേക്ഷ ഹൈക്കോടതി തള്ളിയ സാഹചര്യത്തില് ഓണ്ലൈന് മാധ്യമമായ മറുനാടന് മലയാളിയുടെ എഡിറ്റര് ഷാജന് സ്കറിയെ അറസ്റ്റ് ചെയ്യാന് പോലീസ് നീക്കം. ഷാജന് രാജ്യം വിടാതിരിക്കാന് വിമാനത്താവളങ്ങളില് പൊലീസ് ലൂക്ക് ഔട്ട് നോട്ടീസ് നല്കി. ഷാജന് സ്കറിയയയ്ക്കായി പൊലീസ് പരിശോധന നടത്തുന്നുണ്ട്. രണ്ടാഴ്ചയായി ഇയാള് ഒളിവിലാണെന്നാണ് പോലീസ് നല്കുന്ന വിവരം. ഷാജന്റെ ഫോണും സ്വിച്ച് ഓഫാണ്.
വ്യാജ വാര്ത്ത നല്കി വ്യക്തി അധിക്ഷേപം നടത്തിയെന്നാരോപിച്ച് എംഎല്എ നല്കിയ പരാതിയിലാണ് കേസ്. എസ്സി-എസ്ടി പീഡന നിരോധന നിയമം നിലനില്ക്കുമെന്നും മുന്കൂര് ജാമ്യ ഹര്ജി തള്ളുന്നുവെന്നുമാണ് ജസ്റ്റിസ് വി ജി അരുണിന്റെ ബെഞ്ച് ഉത്തരവിട്ടത്. മറുനാടന് മലയാളി സിഇഒ ആന് മേരി ജോര്ജ്, ചീഫ് എഡിറ്റര് ജെ. റിജു എന്നിവരാണ് മറ്റു പ്രതികള്.
