ന്യൂദല്ഹി: സ്വകാര്യ സ്കൂള് അധ്യാപകര്ക്കായി സമഗ്രമായ ദേശീയ സ്വകാര്യ സ്കൂള് അധ്യാപക ക്ഷേമ ബോര്ഡ് രൂപീകരിക്കണമെന്ന് ആവശ്യപ്പെട്ട് സുപ്രീം കോടതിയില് ഹര്ജി. ഹര്ജിയില് കേന്ദ്ര സര്ക്കാരിനും സംസ്ഥാനങ്ങള്ക്കും പ്രതികരണം തേടി നോട്ടീസ് അയച്ചു. ഓള് ഇന്ത്യ ടീച്ചേഴ്സ് ഫെഡറേഷന്റെ ദേശീയ കോര്ഡിനേറ്റര് ലിജിമോള് ജോര്ജ് സമര്പ്പിച്ച ഹര്ജിയിലാണ് കോടതി നടപടി.
വിദ്യാഭ്യാസ മേഖലയില് സ്വകാര്യ സ്കൂള് അധ്യാപകരുടെ പങ്ക് വളരെ വലുതാണെന്നും എന്നാല് അവരുടെ ക്ഷേമത്തിനായി ഒരു ദേശീയ നിയമ സംവിധാനം ഇല്ലെന്നും ഹര്ജിയില് ചൂണ്ടിക്കാട്ടുന്നു. സംസ്ഥാനങ്ങളിലുടനീളം ക്ഷേമ നടപടികള് ഏകോപിപ്പിക്കുന്നതിനും നിരീക്ഷിക്കുന്നതിനുമായി ഒരു ദേശീയ സ്വകാര്യ സ്കൂള് അധ്യാപക ക്ഷേമ ബോര്ഡ് സ്ഥാപിക്കണം. ഇന്ത്യയിലുടനീളമുള്ള അംഗീകൃത സ്വകാര്യ അണ്എയ്ഡഡ് സ്കൂളുകളില് 37,30,047 അധ്യാപകര് ജോലി ചെയ്യുന്നുണ്ട്. എന്നാല് ന്യായമായ ശമ്പളം, ഉറപ്പായ പെന്ഷന്, മതിയായ വൈദ്യസഹായം, ഇന്ഷുറന്സ്, വൈകല്യ സംരക്ഷണം, വിരമിക്കല് ആനുകൂല്യങ്ങള് എന്നിവയെന്നും ഇത്തരം അധ്യാപകര്ക്ക് ലഭിക്കുന്നില്ലെന്ന് ഹര്ജിയില് പറയുന്നു.
