മലപ്പുറം: സംസ്ഥാനത്ത് വീണ്ടും പനിമരണം. മലപ്പുറം പൊന്നാനിയില് 70 വയസുള്ള അച്ഛനും 45 വയസുള്ള മകനും മരിച്ചത് എലിപ്പനി ബാധിച്ചെന്ന് സ്ഥിരീകരിച്ചു. കര്ഷകരായ സുനില് (45), വാസു(70) എന്നിവരാണ് മരിച്ചത്.
പരിശോധനാ ഫലത്തിലാണ് എലിപ്പനി മൂലമാണ് മരണമെന്ന് വ്യക്തമായത്. 24, 28 തീയതികളിലാണ് അച്ഛനും മകനും മരിച്ചത്. ജില്ലയില് ഒരു വീട്ടില് തന്നെ അടുത്തടുത്ത ദിവസങ്ങളിലായി രണ്ട് എലിപ്പനി മരണങ്ങള് റിപ്പോര്ട്ട് ചെയ്ത സാഹചര്യത്തില് ജനങ്ങള് കൂടുതല് ജാഗ്രത പാലിക്കണമെന്ന് ജില്ലാ മെഡിക്കല് ഓഫീസര് ഡോ. ആര് രേണുക അറിയിച്ചു.
മൃഗങ്ങളെ പരിപാലിക്കുന്നവര്, കാര്ഷികവൃത്തിയില് ഏര്പ്പെടുന്നവര്, മലിന ജലവുമായി സമ്പര്ക്കത്തില് വരാന് സാധ്യതയുള്ള ജോലികള് ചെയ്യുന്നവര് തുടങ്ങിയവരെല്ലാം എലിപ്പനി ബാധിക്കാന് കൂടുതല് സാധ്യതയുള്ളവരാണ്. ഇവര് പ്രത്യേകം ശ്രദ്ധിക്കണമെന്നും പ്രതിരോധ മാര്ഗങ്ങള് സ്വീകരിക്കണമെന്നും ജില്ലാ മെഡിക്കല് ഓഫീസര് അറിയിച്ചു.
