കോട്ടയം: പാചകവാതക സിലിണ്ടര്‍ കയറ്റിവന്ന മിനിലോറിക്ക് തീപിടിച്ചു. ഉച്ചയ്‌ക്ക് 11.45ഓടെ കോട്ടയം തോട്ടയ്‌ക്കാട് കവലയിൽ വച്ചാണ് വാഹനത്തിന് തീ പിടിച്ചത്. ആര്‍ക്കും പരിക്കേറ്റതായി റിപ്പോര്‍ട്ടില്ല. ലോറിയുടെ ക്യാബിനിലാണ് ആദ്യം തീപടര്‍ന്നതെന്ന് ദൃക്‌സാക്ഷികള്‍ പറഞ്ഞു.
വാഹനം നിന്നുപോയതിനെ തുടർന്ന് പാലാ സ്വദേശി മനോജ് ഇറങ്ങി നോക്കിയപ്പോഴാണ് തീ കണ്ടത്. വാഹനത്തിൽ പാചകവാതകം നിറച്ച രണ്ട് സിലിണ്ടറുകളും ബാക്കി കാലി സിലിണ്ടറുകളുമായിരുന്നു. തീ പടർന്ന് വാഹനം ആളിക്കത്തിയതോടെ ഇതുവഴിയുള്ള വാഹനങ്ങൾ വഴി തിരിച്ചുവിട്ടു. മല്ലപ്പള്ളിയിലെ ഇന്ത്യൻ ഗ്യാസ് ഏജൻസിയുടെ വാഹനമാണ് തീപിടിച്ചത്.
കോട്ടയത്ത് നിന്നും ഫയർ ഫോഴ്സിന്റെ രണ്ട് യൂണിറ്റുകളെത്തി തീ നിയന്ത്രണവിധേയമാക്കി.
