ന്യൂദല്ഹി : കാസര്കോട് ജില്ലയിലെ എന്ഡോസള്ഫാന് ഇരകള്ക്കുള്ള സംസ്ഥാന സര്ക്കാരിന്റെ ചികിത്സാ സഹായധന വിതരണത്തിന്റെ മേല്നോട്ടം വഹിക്കാന് സുപ്രീം കോടതി കേരള ഹൈക്കോടതിയോട് ആവശ്യപ്പെട്ടു. ചീഫ് ജസ്റ്റിസ് ഡി.വൈ. ചന്ദ്രചൂഡ് അധ്യക്ഷനായ ഡിവിഷന് ബെഞ്ചിന്റേതാണ് നിര്ദ്ദേശം. ഹൈക്കോടതി ചീഫ് ജസ്റ്റിസ് അധ്യക്ഷനായ ഡിവിഷന് ബെഞ്ച് നടപടികള് നിരീക്ഷിക്കാനാണ് ആവശ്യപ്പെട്ടിരിക്കുന്നത്.
എന്ഡോസള്ഫാന് ദുരിത ബാധിതരുടെ ചികിത്സ സംബന്ധിച്ച് നല്കാന് കാസര്കോട് ജില്ലാ ലീഗല് സര്വീസസ് അതോറിട്ടി സെക്രട്ടറി സുപ്രീംകോടതിക്ക് റിപ്പോര്ട്ട് നല്കിയിരുന്നു. ഈ റിപ്പോര്ട്ടിലെ ശുപാര്ശകള് നടപ്പാക്കുന്നത് സംബന്ധിച്ച മേല്നോട്ടം വഹിക്കാനാണ് സുപ്രീംകോടതി നിര്ദേശം നല്കിയിരിക്കുന്നത്. നിലവില് സുപ്രീംകോടതിയുടെ പരിഗണനയില് ഇരുന്ന കേസ് ഹൈക്കോടതി ഡിവിഷന് ബെഞ്ചിലേക്ക് മാറ്റാനും സുപ്രീംകോടതി ആവശ്യപ്പെട്ടിട്ടുണ്ട്.
എന്ഡോസള്ഫാന് ഇരകള്ക്കുള്ള നഷ്ടപരിഹാര വിതരണം പൂര്ത്തിയാക്കായതായി ചീഫ് സെക്രട്ടറി നേരത്തെ കോടതിയെ അറിയിച്ചിരുന്നു. ഇരകള്ക്ക് അഞ്ച് ലക്ഷം രൂപ വീതമാണ് നഷ്ടപരിഹാരമായി നല്കിയത്. സുപ്രീം കോടതി ഉത്തരവിനെ തുടര്ന്നാണ് 3700 ല് ഇരകള്ക്ക് ഈ തുക സര്ക്കാര് കൈമാറിയെന്നാണ് റിപ്പോര്ട്ടില് പറയുന്നത്. സുപ്രീംകോടതി ഇതില് തൃപ്തി രേഖപ്പെടുത്തി.
എന്ഡോസള്ഫാന് ഇരകള്ക്ക് സുപ്രീംകോടതി വിധിച്ച അഞ്ച് ലക്ഷം രൂപ നഷ്ടപരിഹാരം വിതരണം ചെയ്യുന്നില്ലെന്ന് ആരോപിച്ച് എട്ട് ഇരകളാണ് ചീഫ് സെക്രട്ടറിയെ എതിര്കക്ഷിയാക്കി കോടതിയലക്ഷ്യ ഹര്ജി നല്കിയത്. എന്ഡോസള്ഫാന് ഇരകളായ ഹര്ജിക്കാര്ക്കുവേണ്ടി മുതിര്ന്ന അഭിഭാഷകന് പി.എന് രവീന്ദ്രനും, അഭിഭാഷകന് പി.എസ് സുധീറും ഹാജരായി. സംസ്ഥാന ചീഫ് സെക്രട്ടറിക്കുവേണ്ടി സീനിയര് അഭിഭാഷാകന് ജയ്ദീപ് ഗുപ്ത, സ്റ്റാന്ഡിങ് കോണ്സല് നിഷേ രാജന് ഷൊങ്കര് എന്നിവരും സുപ്രീംകോടതിയില് ഹാജരായി.
