ബെംഗളൂരു: അധികാരത്തിലെത്താന്‍ കോണ്‍ഗ്രസ് മതം ഉപയോഗിച്ചെന്ന് കേന്ദ്ര പ്രതിരോധ മന്ത്രി രാജ്നാഥ് സിങ്. കര്‍ണാടകയിലെ ബെളഗാവിയില്‍ ബിജെപി പൊതുയോഗത്തെ അഭിസംബോധന ചെയ്യുകയായിരുന്നു അദ്ദേഹം. മുസ്ലീങ്ങളെ പ്രീണിപ്പിക്കാന്‍ വേണ്ടി മാത്രമാണ് കര്‍ണാടകയില്‍ കോണ്‍ഗ്രസ് നാലു ശതമാനം മത സംവരണം കൊണ്ടുവന്നത്.
ഇന്ത്യയുടെ ചരിത്രത്തില്‍ ഏതെങ്കിലും രാഷ്‌ട്രീയ പാര്‍ട്ടി മതത്തിന്റെ പിന്തുണ എടുത്തിട്ടുണ്ടെങ്കില്‍ അത് കോണ്‍ഗ്രസ് ആണെന്ന് അദ്ദേഹം പറഞ്ഞു. ജാതി, മതം എന്നിവയുടെ അടിസ്ഥാനത്തിലുള്ള വിവേചനത്തില്‍ ബിജെപി ഒരിക്കലും വിശ്വസിക്കുന്നില്ല. ബിജെപിയുടെ സ്വഭാവത്തെക്കുറിച്ച് ലോകത്തിന് മുഴുവന്‍ അറിയാമെന്നതിനാല്‍ അതില്‍ ഒന്നും മറച്ചുവച്ചിട്ടില്ലെന്നും അദ്ദേഹം പറഞ്ഞു.
നീതിയിലും മനുഷ്യത്വത്തിലും ബിജെപി വിശ്വസിക്കുന്നു. എഡി പന്ത്രണ്ടാം നൂറ്റാണ്ടിലെ കര്‍ണാടകയിലെ സാമൂഹിക പരിഷ്‌കര്‍ത്താവായ ബസവേശ്വരയുടെ തത്വങ്ങളാണ് ബിജെപി പിന്തുടരുന്നത്. ബസവേശ്വരയുടെ തത്വങ്ങള്‍ പാലിച്ചുകൊണ്ടാണ് ബിജെപി ഇന്ത്യയില്‍ തങ്ങളുടെ പങ്ക് വഹിക്കുന്നതെന്നും മന്ത്രി പറഞ്ഞു. 224 അംഗ നിയമസഭയില്‍ ബിജെപിക്ക് മൂന്നില്‍ രണ്ട് ഭൂരിപക്ഷം നല്‍കണമെന്ന് രാജ്നാഥ് സിങ് കര്‍ണാടകയിലെ ജനങ്ങളോട് അഭ്യര്‍ത്ഥിച്ചു.
