കൊച്ചി: വിദേശ സൗന്ദര്യ വര്ദ്ധക വസ്തുക്കളുടെ മറവില് എംഡിഎംഎ വില്പന നടത്തിയിരുന്നയാള് എക്സൈസ് പിടിയില്. മലപ്പുറം സ്വദേശി റാഷിദ് ഏനാത്ത് (34) ആണ് എറണാകുളം എക്സൈസ് സ്പെഷ്യല് സ്ക്വാഡിന്റെ പിടിയിലായത്. ‘മഞ്ചേരി മജീദ് ‘ എന്ന രഹസ്യ കോഡിലായിരുന്നു ഇയാള് അറിയപ്പെട്ടിരുന്നത്. മലപ്പുറത്ത് നിന്ന് മയക്ക് മരുന്നുമായി കൊച്ചിയിലേക്ക് വന്ന റാഷിദിന്റെ കാര് എക്സൈസ് സംഘം പിന്തുടര്ന്ന് കലൂര് സ്റ്റേഡിയം ഭാഗത്ത് വച്ച് വളഞ്ഞ് പിടികൂടുകയായിരുന്നു.
മയക്കുമരുന്ന് കടത്താന് ഉപയോഗിച്ചിരുന്ന സ്വിഫ്റ്റ് കാര്, ഇടപാട് നടത്തുവാന് ഉപയോഗിച്ചിരുന്ന രണ്ട് ഐ ഫോണുകള് എന്നിവയും എക്സൈസ് കസ്റ്റഡിയില് എടുത്തു. ഇയാളുടെ പക്കല് നിന്നും ഇയാള് സഞ്ചരിച്ചിരുന്ന കാറില് നിന്നുമായി 9 ഗ്രാം എം ഡി എം എ പിടിച്ചെടുത്തു. പ്രധാനമായും ഹോസ്റ്റലുകളില് താമസിക്കുന്ന യുവതി യുവാക്കളെ ലക്ഷ്യമിട്ടായിരുന്നു ലഹരി വില്പ്പന നടത്തിയിരുന്നത്.
ഇയാളുടെ കെണിയില് അകപ്പെട്ട് പോയ യുവതി യുവാക്കളെ കണ്ടെത്തി എറണാകുളം കച്ചേരിപ്പടി, മൂവാറ്റുപുഴ എന്നിവിടങ്ങളില് പ്രവര്ത്തിച്ചു വരുന്ന എക്സൈസിന്റെ സൗജന്യ ലഹരി വിമുക്ത ചികില്സാ കേന്ദ്രങ്ങളില് എത്തിക്കുന്നതിനുള്ള നടപടികള് സ്വീകരിക്കുമെന്ന് എക്സൈസ് ഉദ്യോഗസ്ഥര് അറിയിച്ചു.
