കാസർകോട്: ലക്ഷക്കണക്കിന് രൂപയും സ്വത്തുക്കളും തട്ടിയെടുത്ത് 84 വയസുള്ള വൃദ്ധമാതാവിനെ മകനും മരുമക്കളും ചേര്ന്ന് വീട്ടില് നിന്നും അടിച്ച് പുറത്താക്കി. സംഭവത്തില് മകനും രണ്ട് മരുമകള്ക്കുമെതിരെ കേസെടുത്തു. ഭീമനടി മാങ്ങോട്ടെ മുണ്ടത്താനത്ത് വീട്ടില് ജോസഫിന്റെ ഭാര്യ മറിയം ജോസഫ്(84)നെയാണ് മകനും മരുമക്കളും ചേര്ന്ന് ക്രൂരമായി പീഡിപ്പിച്ചത്. സംഭവത്തില് മകന് ജെയ്സണ്, ഭാര്യ മിനി, മറ്റൊരു മകന് റോയിയുടെ ഭാര്യ മെല്ബി എന്നിവര്ക്കെതിരെ ചിറ്റാരിക്കാല് പോലീസ് കേസെടുത്തു.
വാര്ദ്ധക്യകാലത്ത് നല്കേണ്ട ശ്രദ്ധയോ സംരക്ഷണമോ നല്കാതെ കസേര കൊണ്ട് അടിച്ച് പരിക്കേല്പ്പിക്കുകയും വീട്ടില് നിന്നും ഇറക്കിവിടുകയും ചെയ്തതിന് ഐപിസി 186, 324, 34 മെയിന്റന്സ് ആന്റ് വെല്ഫെയര് ഓഫ് പാരന്റ്സ് ആന്റ് സീനിയര്സിറ്റിസണ് ആക്ട് 2007 ല് 24 എന്നീ വകുപ്പുകള് പ്രകാരമാണ് മക്കള്ക്കും മരുമക്കള്ക്കുമെതിരെ കേസെടുത്തിരിക്കുന്നത്. ഭര്ത്താവിന്റെ മരണശേഷം മറിയം ജെയ്സണും റോയിക്കുമൊപ്പമാണ് താമസം. ഇവരുടെ സ്വത്തുക്കള് ഏഴ് മക്കള്ക്കും തുല്യമായി വീതം വെച്ച് നല്കിയിരുന്നു. അമ്മയെ സംരക്ഷിക്കാനായി ഇരുമക്കള്ക്കും അമ്മയ്ക്കുമായി മറ്റൊരു മകന് സജി സ്വത്ത് സംബന്ധിച്ച ഇടപാടുകളും മറ്റും തീര്ത്ത് 80 ലക്ഷം രൂപ നല്കിയിരുന്നു. ഇതില് അമ്മയ്ക്ക് നല്കിയ 10 ലക്ഷം രൂപയും മക്കള് രണ്ടുപേരും കൈക്കലാക്കി. പിന്നീടാണ് ഇവരെ പീഡിപ്പിക്കാന് തുടങ്ങിയത്.
ഭക്ഷണവും മരുന്നും നല്കാതെ പട്ടിണികിടത്തുകയും പതിവായി മര്ദ്ദിക്കുകയും ചെയ്തിരുന്നതായി മറിയം പോലീസില് നല്കിയ മൊഴിയില് പറയുന്നു. മര്ദ്ദനം സഹിക്കാന് കഴിയാതെ ഇവര് കോഴിക്കോട് നെല്ലിപ്പൊയില് പള്ളിപ്പാലത്തുള്ള സഹോദരന് ഷാജിയെ വിവരം അറിയിച്ചു. മക്കളും മരുമക്കളും ചേര്ന്ന് തന്നെ കൊല്ലുമെന്ന് ഭയപ്പെടുന്നതായാണ് മറിയം സഹോദരനെ അറിയിച്ചത്. തുടര്ന്ന് ഷാജിയും മറ്റ് സഹോദരങ്ങളും ഭീമനടിയിലെത്തി സഹോദരിയെ കോഴിക്കോട്ടേക്ക് കൊണ്ടുപോവുകയായിരുന്നു. ഇതിന് ശേഷമാണ് മറിയം പോലീസില് പരാതിപ്പെട്ടത്.
2021 ഏപ്രില് മാസം മുതല് 3 പേരും ചേര്ന്ന് മറിയം ജോസഫിനെ ക്രൂരമായി പീഡിപ്പിച്ചിരുന്നുവെന്നാണ് പോലീസിന്റെ എഫ്ഐആറില് പറയുന്നത്. കഴിഞ്ഞ ജൂണ് 10ന് മരുമകള് മിനിയാണ് മറിയം ജോസഫിനെ കസേരകൊണ്ട് അടിച്ച് പരിക്കേല്പ്പിച്ചത്. ഇതിനുശേഷം ആഗസ്റ്റ് 22ന് മൂന്നുപേരും ചേര്ന്ന് ഇവരെ വീട്ടില് നിന്നും അടിച്ച് പുറത്താക്കുകയും ചെയ്തുവെന്നും എഫ്ഐആറില് പറയുന്നുണ്ട്. രണ്ട് തവണ ശസ്ത്രക്രിയക്ക് വിധേയയായ മറിയത്തിന് മറ്റ് ശാരീരിക അസുഖങ്ങളുമുണ്ട്. ഭക്ഷണം നല്കാതെയും കുളിപ്പിക്കാതെയും ഇവരെ പട്ടിണികിടത്തി കൊലപ്പെടുത്തുകയായിരുന്നു മക്കളുടേയും മരുമക്കളുടേയും ലക്ഷ്യമെന്ന് സഹോദരങ്ങളും ആരോപിച്ചു.
