ന്യൂദല്ഹി:കോണ്ഗ്രസില് നിന്നും രാജിവെച്ച് പുറത്തുപോയ ഗുലാം നബി ആസാദിന്റെ സല്പേര് കളങ്കപ്പെടുത്തുന്ന രീതിയില് എഴുതാന് ജേണലിസ്റ്റുകള്ക്ക് കോണ്ഗ്രസ് പണം നല്കുന്നതായി മുതിര്ന്ന ജേണലിസ്റ്റ് പല്ലവി ഘോഷ്. നല്ല പണം നല്കുമെന്നാണ് കോണ്ഗ്രസ് വാഗ്ദാനമെന്നും പല്ലവി ഘോഷ് പറയുന്നു. സിഎന്എന്ന്യൂസ് 18ലെ സീനിയര് എഡിറ്റര് കൂടിയാണ് പല്ലവി ഘോഷ്.
ഹല്ലാ ബോല് റാലിക്ക് മുന്നോടിയായി കോണ്ഗ്രസ് രാഷ്ട്രീയം സ്ഥിരമായി എഴുതുന്ന ഏതാനും ജേണലിസ്റ്റുകളോട് ട്വീറ്റിലൂടെ ഗുലാം നബി ആസാദിനെ ശരിപ്പെടുത്താന് വിവരം ലഭിച്ചെന്നും ഇതിന് നല്ല തുക നല്കുമെന്നും സൂചന ലഭിച്ചെന്നും ട്വീറ്റുകള് കാത്തിരിക്കാമെന്നും പല്ലവി ഘോഷ് ട്വീറ്റ് ചെയ്തു.
ഞായറാഴ്ചയായിരുന്നു ദല്ഹിയിലെ രാംലീല മൈതാനിയില് കോണ്ഗ്രസിന്റെ ഹല്ലാ ബോല് റാലി. ബിജെപി സര്ക്കാരിനെതിരെയായിരുന്നു ഈ റാലി. കോണ്ഗ്രസ് വിട്ട ശേഷം കോണ്ഗ്രസ് അനൂകൂല ജേണലിസ്റ്റുകള് തുടര്ച്ചയായി മാധ്യമങ്ങളില് ആസാദിനെ ആക്രമിച്ചുകൊണ്ടിരിക്കുകയാണ്. വരും നാളുകളില് അതിനിയും വര്ധിക്കുമെന്നാണ് പല്ലവി ഘോഷ് നല്കുന്ന സൂചന. 50 വര്ഷക്കാലത്തെ കോണ്ഗ്രസ് ബന്ധം ഉപേക്ഷിച്ചാണ് ആഗസ്ത് 26ന് ഗുലാം നബി ആസാദ് കോണ്ഗ്രസ് വിട്ടത്.
ഏറ്റവുമൊടുവില് ജമ്മുകശ്മീര് യൂണിറ്റിലെ രണ്ട് കമ്മിറ്റികളില് തരംതാഴ്ത്തിയതോടെയാണ് ഗുലാം നബി ആസാദ് പാര്ട്ടി വിടാന് തീരുമാനിച്ചത്. കോണ്ഗ്രസ് വിട്ട് പുറത്തുവന്നതിന് ശേഷം രാഹുല്ഗാന്ധിയാണ് കോണ്ഗ്രസ് പാര്ട്ടിയുടെ തകര്ച്ചയ്ക്ക് കാരണമെന്ന് ഗുലാം നബി ആസാദ് തുറന്നടിച്ചിരുന്നു. രാഹുല്ഗാന്ധിയുടെ തെറ്റുകള്ക്ക് നേരെ ഏതൊരമ്മയേയും പോലെ സോണിയയും കണ്ണടയ്ക്കുകയാണെന്നും ഗുലാം നബി ആരോപിച്ചിരുന്നു. ഇതാണ് കോണ്ഗ്രസിനെ പ്രകോപിപ്പിച്ചിരിക്കുന്നത്.
