ന്യൂദല്ഹി: കോണ്ഗ്രസ് അദ്ധ്യക്ഷ സ്ഥാനത്തേക്കുള്ള തിരഞ്ഞെടുപ്പ് ഒക്ടോബര് 17ന് നടക്കും. വോട്ടെണ്ണല് ഒക്ടോബര് 19നും. ഞായറാഴ്ച ചേര്ന്ന കോണ്ഗ്രസ് പ്രവര്ത്തക സമിതി യോഗമാണ് തിരഞ്ഞെടുപ്പ് തിയതികള് പ്രഖ്യാപിച്ചത്.
തിരഞ്ഞെടുപ്പിനുള്ള വിജ്ഞാപനം സെപ്തംബര് 22ന് പുറപ്പെടുവിക്കുമെന്നും നാമനിര്ദ്ദേശ പത്രിക സമര്പ്പിക്കല് സെപ്റ്റംബര് 24ന് ആരംഭിച്ച് സെപ്റ്റംബര് 30 വരെ തുടരുമെന്നും പാര്ട്ടിയുടെ കേന്ദ്ര തിരഞ്ഞെടുപ്പ് അതോറിറ്റി ചെയര്മാന് മധുസൂദന് മിസ്ത്രി അറിയിച്ചു.
ഇടക്കാല അധ്യക്ഷ സോണിയാ ഗാന്ധി, രാഹുല്, പ്രിയങ്ക എന്നിവര് ഓണ്ലൈനിലൂടെയാണ് പ്രവര്ത്തക സമിതി യോഗത്തില് പങ്കെടുത്തത്. മുതിര്ന്ന നേതാവും മുന് കേന്ദ്രമന്ത്രിയുമായ ഗുലാം നബി ആസാദ് പാര്ട്ടിയില്നിന്ന് രാജിവച്ചതിന് തൊട്ടുപിന്നാലെ ചേര്ന്ന പ്രവര്ത്തക സമിതി യോഗത്തിലാണ് പ്രസിഡന്റ് തിരഞ്ഞെടുപ്പ് സംബന്ധിച്ച സുപ്രധാന തീരുമാനമുണ്ടായത്. രാഹുല് ഗാന്ധിക്കെതിരെ രൂക്ഷ വിമര്ശനം ഉന്നയിച്ചുകൊണ്ടാണ് ഗുലാം നബി രാജിവച്ചത്. പാര്ട്ടിയുടെ കൂടിയാലോചനാ സംവിധാനങ്ങള് മുഴുവന് രാഹുല് തകര്ത്തതായി ആസാദ് വിമര്ശനം ഉന്നയിച്ചിരുന്നു.
