തിരുവനന്തപുരം: അക്ഷരശ്ലോക സംസ്കാരം കുട്ടികളുടെ ഭൗതീകവും മാനസികവുമായ വളര്ച്ചയില് നിര്ണായക പങ്കാണുള്ളതെന്നും 6 വയസു മുതല് 100 വയസുവരെ ഒരുമിച്ച് ആനന്ദിക്കുന്ന ജനകീയ കലയാണ് അക്ഷരശ്ലോക കലയെന്നും ചീഫ് സെക്രട്ടറി വി.പി ജോയി. ഭാരത് ഭവന്റെയും അക്ഷരകേളിയുടെയും സഹകരണത്തോടെ സാഹിത്യ അക്കാദമി സംഘടിപ്പിച്ച അക്ഷര ശ്ലോക സമാരോഹം പരിപാടി ഭാരത് ഭവനില് ഉദ്ഘാടനം ചെയ്യുകയായിരുന്നു അദ്ദേഹം.
കാവ്യലോകത്ത് നിര്ഭയമായി സംവദിക്കാന് കഴിയുന്ന പുതിയ തലമുറയെ വാര്ത്തെടുക്കുന്നതിനും ഭാഷയുടെ കരുത്തും സൗന്ദര്യവും എന്താണെന്ന് മനസിലാക്കിക്കൊടുക്കുന്നതിനും അക്ഷരശ്ലോക സദസ്സുകള് ഏറെ ഗുണം ചെയ്യുമെന്നും നമ്മുടെ ഭാഷയ്ക്ക് മറ്റു ഭാഷകള്ക്കില്ലാത്തവിധത്തിലുള്ള സംഗീത സംവേദന ക്ഷമത എങ്ങനെയാണ് കൈവരുന്നതെന്ന് മനസിലാക്കാനും അക്ഷരശ്ലോക സദസ്സുകള്മൂലം സാധിക്കുമെന്നും ചടങ്ങില് അധ്യക്ഷനായിരുന്ന കവി പ്രഭാവര്മ്മ അഭിപ്രായപ്പെട്ടു. ഭാരത് ഭവനില് അക്ഷരശ്ലോക സദസ്സിന് സ്ഥിരം വേദിയുണ്ടാകുമെന്നു ഭാരത് ഭവന് സെക്രട്ടറി പ്രമോദ് പയ്യന്നൂര് അഭിപ്രായപ്പെട്ടു.
സാഹിത്യ അക്കാദമി ജനറല് കൗണ്സില് അംഗം ഡോ. അജിത് കുമാര്, അക്ഷര ശ്ലോക കലാക്ഷേത്രം അരിയന്നൂര് ഉണ്ണിക്കൃഷ്ണന്, അക്ഷരകേളി സെക്രട്ടറി കെ.വേലപ്പന്പിള്ള, കൈരളി ശ്ലോക രംഗം സെക്രട്ടറി ഡോ. ആര്യാംബിക എസ്. വി., സാഹിത്യ അക്കാദമി ഉപദേശക സമിതി അംഗം ഹരികുമാര് എന്നിവര് സംബന്ധിച്ചു.
