കൊച്ചി : അഞ്ചേരി ബേബി വധക്കേസില്‍ മുന്‍ മന്ത്രി എം.എം മണിയെ കുറ്റവിമുക്തനാക്കി ഹൈക്കോടതി. എം.എം.മണിയുടെ വിടുതല്‍ ഹര്‍ജി അംഗീകരിച്ചാണ് ഹൈക്കോടതി എം.എം.മണി അടക്കം മൂന്ന് പ്രതികളെ ഹൈക്കോടതി കുറ്റവിമുക്താരക്കിയത്. നേരത്തെ സെഷന്‍സ് കോടതിയെ എം.എം. മണി വിടുതല്‍ ഹര്‍ജിയുമായി സമീപിച്ചിരുന്നുവെങ്കിലും കോടതി ഹര്‍ജി തള്ളിയിരുന്നു. ഇതോടെയാണ് മണിയും മറ്റു രണ്ടു പ്രതികളും ഹൈക്കോടതിയെ സമീപിക്കുകയായിരുന്നു.
2012 മെയില്‍ ഇടുക്കി മണക്കാട് നടത്തിയ വിവാദപ്രസംഗത്തിലൂടെയാണ് അഞ്ചേരി ബേബി വധക്കേസിലേക്ക് മണി പ്രതിയാവുന്നത്. 1,2,3 പ്രസംഗത്തിലൂടെ 1982- ലെ കൊലപാതക കേസില്‍ ഹൈക്കോടതി പുനരന്വേഷണത്തിന് ഉത്തരവിടുകയും 2012 നവംബറില്‍ അന്നത്തെ സിപിഎം ജില്ലാ സെക്രട്ടറി എംഎം മണിയടക്കമുള്ള മൂന്ന് നേതാക്കള്‍ അറസ്റ്റിലാവുകയും ചെയ്തു. എം.എം. മണിയെ കൂടാതെ ഒ.ജി. മദനനന്‍, പാമ്പുപാറ കുട്ടന്‍ എന്നിവരാണ് കേസിലെ മറ്റു രണ്ട് പ്രതികള്‍.
തുടര്‍ന്ന് ഇടുക്കിയിലെ വീട്ടില്‍ നിന്നും ഐജിയുടെ നേതൃത്വത്തില്‍ പോലീസ് കസ്റ്റഡിയിലെടുത്ത എം.എം. മണിയുള്‍പ്പടെയുള്ളവര്‍ 46 ദിവസം ജയിലില്‍ കഴിയുകയും ചെയ്തിരുന്നു. ജയില്‍ മോചിതനായി പുറത്തുവന്ന ശേഷം എം.എം. മണി വിടുതല്‍ ഹര്‍ജിയുമായി സെഷന്‍സ് കോടതിയെ സമീപിച്ചെങ്കിലും ഹര്‍ജി തള്ളിയ കോടതി മണിയും കൂട്ടുപ്രതികളും വിചാരണ നേരിടാനും ആവശ്യപ്പെട്ടു. ഈ വിധി ചോദ്യം ചെയ്ത് മണി ഹൈക്കോടതിയെ സമീപിക്കുകയായിരുന്നു.
അതേസമയം ഉത്തരവ് വലിയ നീതിനിഷേധമാണെന്ന് അഞ്ചേരി ബേബിയുടെ സഹോദരന്‍ അഞ്ചേരി ജോര്‍ജ് പ്രതികരിച്ചു. പ്രതികളുടെ ഉന്നതസ്വാധീനം ഉപയോഗിച്ച് കേസ് പലവട്ടം നീട്ടുകയും പല ബെഞ്ചുകള്‍ മാറുകയും ചെയ്തു. സാമ്പത്തികാവസ്ഥ മൂലം നല്ലൊരു വക്കീലിനെ വച്ച് കേസ് നടത്താന്‍ സാധിച്ചില്ല. കേസില്‍ കക്ഷി ചേര്‍ന്ന് ഞാന്‍ പരമാവധി ശ്രമിച്ചെങ്കിലും മുതിര്‍ന്ന അഭിഭാഷകനെ വച്ച് വാദിക്കാന്‍ സാധിച്ചിരുന്നില്ല. കേസ് ഏറ്റെടുക്കാമെന്ന് കോണ്‍ഗ്രസ് നേതാക്കള്‍ അറിയിച്ചിട്ടുണ്ട്. അവരുമായി ചര്‍ച്ച ചെയ്ത ശേഷം കൂടുതല്‍ നടപടി സ്വീകരിക്കുമെന്ന് ജോര്‍ജ് കൂട്ടിച്ചേര്‍ത്തു.
